SPAK ka mbyllur hetimet dhe ka dërguar për gjykim dosjen kundër ish-drejtorit të burgut të Lushnjes, Judmir Shurdhi dhe pesë personave të tjerë, zyrtarë të akuzuar për shkelje të barazisë në tendera.
SPAK deklaron se nga hetimet ka rezultuar se Shurdhi, i cili ishte drejtor në vitin 2020 kur u zbulua shkelja ka shpërdoruar detyrën lidhur me zhvillimin e tenderit për transportin e punonjësve pasi ka ngarkuar të njëjtët persona të jenë në cilësinë e anëtarit të Njësisë së prokurimit dhe Komisionit të vlerësimit të ofertave, ka miratuar shkeljet ligjore të kryera prej tyre, si në vitin 2018 ashtu edhe në vitin 2019, si dhe ka ushtruar presion për kualifikimin e një operatori që mori pjesë në garë.
Për gjykim janë dërguar edhe Mariglen Myftari, Erjon Çela, Miranda Idrizi, punonjës të IEVP Lushnje dhe Krenar Gozhina ish-punonjës në IEVP Lushnje, për veprën penale “Shkelje e barazisë së pjesëmarrësve në tendera apo ankande publike” kryer në bashkëpunim, parashikuar nga neni 258 e 25 i Kodit Penal.
Gjithashtu është në gjykim Mariglen Myftari për veprën penale “Korrupsioni pasiv të personave që ushtrojnë funksione publike” parashikuar nga neni 259 i Kodit Penal si dhe Xhesika Kaja, për veprën penale “Moskallzimi i krimit”.
Discussion about this post