Pas skandalit me Sokol Topçiu, administratori i Farma Net Albania, i cili u arrestua si pjesë e një grupi që kishin ngritur një skemë për shitjen e ilaçeve kontrabandë gjatë pandemisë së COVID, ditën e sotme Polica e Shtetit ka goditur një tjetër rrjet që merren transportonin drejt Tiranës ilaçe për kontrabandë.
Një 31-vjeçar nga Fieri është arrestuar ditën e sotme në Durrës, i akuzuar për kontrabandë me ilaçe. Bëhet me dije se në pranga ka rënë Marjus Lushka, i cili u kap në lagjen nr.13, Durrës, jashtë rrethimit të Portit detar.
Sipas të dhënave, 31-vjeçari kishte në makinën e tij një sasi të konsiderueshme ilaçesh e po ashtu paketime me teste të shpejta COVID.
Mësohet se, Lushka ishte vetëm transportuesi, ndërsa ilaçet po i merrte për llogari të 29-vjeçarit A. B., banues në Tiranë. Për këtë të fundit kanë nisur hetimet.
Ndër të tjera bëhet me dije se materialet i kaluan Prokurorisë së Rrethit Gjyqësor Durrës, për veprime të mëtejshme, ndërsa po merret në pyetje për më shumë detaje 31-vjeçari .
Kujtojmë se ditën e djeshme gjykata vendosi të lirojë nga burgu oligarkun e ilaçeve, Sokol Topçiu, pavarësisht skandalit që u përfshi ai.
Ndërsa 4 ditë më parë 6 persona të tjerë u arrestuan po për të njëjtin motiv dhe pas pak orësh u liruan nga qelia duke marrë dënimin “arrest shtëpie”.
Nuk dihet nëse këto raste kanë lidhje me Sokol Topçiu, por rrjetet të tilla po bëjnë kërdinë në vend.
