Shpërthen Noka: Sillo dhe Nafija të falin para përgjegjësisë, s’ka diskutime me hajdutë

Deputeti i PD, Flamur Noka, nga foltorja e Kuvendit, akuzoi mazhorancën se i ka shpallur luftë opozitës.

Noka theksoi se janë kthyer në Kuvend për të diskutuar për buxhetin, por mosbindja civile do të vazhdojë.

Ndërkohë, në fund të fjalës së tij, Noka njoftoi se SPAK sapo ka pushuar çështjen ndaj deputetes së PD-s, Elda Hoti, e cila u akuzua se hodhi lëndë të dyshimta në Kuvend.

“Nuk pranoj asnjë këshillë nga hajdutët.

Teksa dëgjojmë çfarë flasin rilindësit këtu, bindesh që ka vetëm një rrugë për t’u marrë vesh me ju, vetëm mosbindja civile për t’u kërryer si sekti më i ndyrë i njerëzimit që ka shkelur në trojet shqiptare, sekti i rilibdjes.

Dëgjojmë se flasin me gjuhë bolshevike dhe shfryjnë mllef kundër opozitës edhe sot këtu.

Nuk po flas për atë zonjën atje, që ka marrë rolin e Nafijes te filmi ‘Gjuetia e fundit’.

Silloja përcaktonte politikat, kurse Nafija zbatonte urdhrat, nuk kishte as të drejtë të mendonte.

Kjo është katandisja ku e keni çuar Kuvendin.

Sot nuk kemi ardhur për ju, se nuk mund të ndodhë ne të ulemi me hajdutët, me përfaqësuesit e krimit të organizuar, me ata që kanë shpopulluar Shqipërinë.

Jo, ne sot kemi ardhur të përfaqësojmë vullnetin e popullit opozitar për t’u shprehur për atë buxhet që e keni vjedhur.

Ne kemi ardhur sot t’u çjerrim maskën, t’u themi se herë pas here kujtoheni se opozita duhet parë, por e keni trajtuar opozitën si armike.

Çfarë po bën kjo Nafija këtu? Sa u ul në atë karrige, akti i parë që bëri është shpallja e luftës ndaj opozitës.

Se ju ëndërroni të keni një parlament monist dhe po bëni gjithçka për këtë.

Ju ëndërroni të keni një vend që të jetë monizëm i plotë se sulltani juaj nuk duron dot të ketë kundërshtarë.

Sulltani do skllevër, do raja, ja kështu i do, do një tufë me pengje këtu me të cilët ndan pasuritë e Shqipërisë dhe i vjedh.

A mund ta pranojmë këtë ne? Jo, jo. Ne jemi këtu për betejë, për këtë të jeni të sigurt.

Mosbindja civile do të vazhdojë gjersa t’ju kërrejë.

Buxheti nuk është i juaji, sepse buxhetin e keni trajtuar si plaçkë tregu, tufë hajdutësh që jeni vërsulur mbi të.

Ne do u themi shqiptarëve se çfarë ishte buxheti i vitit 2023, ku shkuan taksat e tyre, kush i vodhi dhe çfarë duhet të bëjmë.

Sot mllefin që keni treguar ndaj opozitës, e rrëzoi edhe ai Skapi i partisë. Sapo ka rrëzuar padinë edhe ndaj zonjës Hotit, edhe për karriget e famshme tuajat.

Sepse zotëria aty është ministri i Brendshëm, duhet të japë përgjigje para ligjit pse ka futur policinë këtu.

Ti zonja Nafije duhet të japësh përgjigje pse ke futur këtu policinë në kundërshtim me ligjin.

Kjo tregon mllef ndaj opozitës.

Harrojeni, ju na dukeni si miza, prandaj do ju kërcejmë,” tha Noka.

Ndërsa e quajti Spiropalin “Nafie”, kjo e fundit e këshilloi që t’i kursejë metaforat.

“Flamur po e marr për replike. I ke pak të vjetëruara këto metaforat dhe krahasimet, por mua më kishe munguar në këtë foltore. Ku ta gjej që të jeni këtu që të diskutojmë. Keni bërë mirë që jeni këtu, se qytetarët duhet tju dëgjojnë. Por ato metaforat kurseji pak se nuk shkojnë”, u shpreh ajo.