Barazimi ndaj Kukësit ishte ndalesa e katërt radhazi për skuadrën e Partizanit që nuk ka shijuar ende fitoren e parë në pesë javët e kampionatit. Në kampin e kryeqytetasve kishte shumë optimizëm se ndaj verilindorëve do të fitonin por në fund skuadrat u ndalën vetëm në barazim. Një moment aspak komod për të kuqtë të cilët kanë mbi supe një presion shumë të madh për të mbajtur për sa kohë skuadra është ndërtuar për të fituar.
Pas ndeshjes me Kukësin trajneri i Partizanit Ilir Daja ka zhvilluar një mbledhje urgjente me drejtuesit e klubit dhe lojtarët e skuadrës në dhomat e zhveshjes ku është ndalur tek situata aspak e mirë. Trajneri Daja është nën presion pas startit të gabuar të kampionatit. Vetëm katër pikë kanë grumbulluar të kuqtë në këtë edicion duke mbetur shumë pikë pas kreut të renditjes.
