Një shpërthim ka ndodhur mbrëmjen e kësaj të Premteje, në një mobilieri në fshatin Arrameras të Fushë-Krujës.
Policia bën me dije me dije se nuk ka persona të lënduar nga shpërthimi, por ka dëme të mëdha materiale pasi e gjithë godina është shkatërruar madje janë dëmtuar dhe bizneset përreth.
Një re tymi është ngritur në ajër pas shpërthimit, që ka shqetësuar banorët.
Mobileria ishte marrë me qira nga Desar Çangu, ndërsa godina ishte në pronësi të Bujar Caracit, vjehrri i Çangut.
Një hetim ka nisur për zbardhjen e ngjarjes.
“Rreth orës 20:40, në aksin rrugor kryesor ‘Fushë Krujë-Tiranë’, në fshatin Arrameras, në ambientet e jashtme të një ndërtese (mobileri) të marrë me qira nga shtetasi D.C., banues në fshatin Larushk, Fushë Krujë, ka shpërthyer një sasi lënde plasëse, duke shkaktuar dëme të shumta materiale”, njoftoi policia.
Në vendngjarje kanë shkuar shërbimet e Policisë të cilat vijojnë kontrollet në zonë, për kapjen e autorit apo autorëve, ndërsa në vendngjarje ndodhen drejtuesit vendorë të Policisë dhe grupi hetimor dhe në drejtimin e Prokurorisë, shtuan të njëjtat burime.
Discussion about this post