Një shpërthim i dyshimtë ka ndodhur mbrëmjen e sotme në pikën kufitare Merdarë mes Kosovës dhe Serbisë. Për shkak të kësaj situate pika kufitare është bllokuar për afro një orë. Zëdhënësi i Policisë së Kosovës, Baki Kelani ka deklaruar për mediet se KFOR-i ka bllokuar qarkullimin e automjeteve dhe personave për të bërë shpërthim të kontrolluar të mjetit të dyshimtë të hedhur në këtë zonë.
“Rreth orës 17:30 në stacionin policor kufitar (SPK-Merdare) nga pjesëtare të KFOR-it është kërkuar ndalimi i përkohshëm i qarkullimit të personave dhe automjeteve, për arsye se janë duke bërë shpërthimin në mënyrë të kontrolluar të një mjeti shpërthyes. Lokacioni i mjetit shpërthyes ka qenë në distancë mbi një kilometër larg pikës kufitare, por për shkaqe sigurie për një kohë të shkurtër është ndërprerë qarkullimi”, ka thënë ai duke shtuar se tashmë situata është nën kontroll dhe po bëhen hetime për të zbuluar se kujt i përkiste ai objekt.
Discussion about this post