Fushë-Krujë | Gijotina.com – Një shpërthim i fuqishëm është dëgjuar pasditen e sotme në afërsi të burgut të Fushë-Krujës, duke shkaktuar panik mes banorëve dhe personelit të institucionit të vuajtjes së dënimit.
Sipas burimeve të Gijotina.com, dyshimet e para janë se shpërthimi ka ardhur nga vendosja e një sasie tritoli në gjeneratorin që furnizon me energji ambientet e jashtme të burgut. Fillimisht është raportuar se gjeneratori ka marrë flakë, por më pas është konstatuar se shpërthimi është shkaktuar nga një lëndë plasëse, duke nxitur dyshimet për një akt të qëllimshëm kriminal.
Forca të shumta policore dhe ekspertë të anti-eksplozivit nga Tirana kanë mbërritur me urgjencë në vendngjarje, ku aktualisht po kryhen veprimet hetimore dhe këqyrja e plotë e terrenit. Gjithashtu, në ndihmë kanë mbërritur edhe zjarrfikësit për të eliminuar çdo rrezik të mëtejshëm.
Deri më tani nuk raportohet për persona të lënduar apo dëme në godinat e burgut, ndërsa dëmi i vetëm i konfirmuar është në gjeneratorin që besohet të ketë qenë objektivi i sulmit.
Autoritetet nuk përjashtojnë pistën e një akti të organizuar kriminal, i cili mund të ketë lidhje me persona të dënuar apo ngjarje të mëparshme të ndodhura në këtë institucion. Hetimet janë në fazë të avancuar dhe pritet një njoftim zyrtar për të bërë të ditura të gjitha detajet e ngjarjes.
Gijotina.com do të vijojë të ndjekë nga afër zhvillimet mbi këtë ngjarje të rëndë që ka tronditur zonën e Fushë-Krujës.
Discussion about this post