Prokuroria e Posaçme (SPAK) ka kërkuar riekspertim për shkaqet e ngjarjes së rëndë në Lushnjë, ku pas një shpërthimi të fuqishëm humbën jetën babë e bir, ndërsa mes 7 të plagosurve ishte edhe deputeti socialist Bujar Çela.
Riekspertimi, do të bëhet për të parë nëse ka patur shkelje të rregullave të sigurisë në punë.
Deputeti po hetohet nga prokuroria për vepra penale “Shkelja e rregullave të mbrojtjes në punë”, “Ndërtimi i paligjshëm”, dhe “Shkatërrimi i pronës nga pakujdesia”. Në pranga për tragjedinë përfundoi Leonard Gjini, pronar i kompanisë që po kryente punimet për ngritjen e magazinës në pronësi të Çelës.
Kujtojmë se ngjarja e rëndë ndodhi më 1 mars 2024, teksa një vinç, ku ndodheshin dy viktimat Roland dhe Elidon Hoxha, baba e bir, po ngrinte një bombol oksigjeni që do të përdorej në lartësi për të kryer saldime, maja e mjetit të hekurt ka hasur në telin përcjellës të tensionit të lartë e për pasojë bombola ka shpërthyer.
Babai ka ndërruar jetë në vinç, ndërsa i biri u transportua me ambulancë në drejtim të Tiranës, por fatkeqësisht rrugës ndërroi jetë.
Discussion about this post