Shpërthimi me tritol dje në Laç, gjendet e djegur një makinë

Një ditë pas shpërthimit me tritol në banesën e Skënder Likës, gjendet mjeti i autorëve. Raportohet se auto-vetura tip ‘Volksvagen Passat’ është gjetur e djegur nga policia ne venin e quajtur Kallmat në fshatin Gramës të Fushë-Krujës.

Mjeti është shkrumbuar totalisht nga flakët dhe për të nuk ka patur njoftim në sallën operative, por është dërguar në komisariatin e policisë në Krujë.

Makina dyshohet të jetë përdorur nga autorët për vënien e sasisë së eksplozivit familjes Lika në Laç. Pritet të vijnë ekspertet nga Laçi për të bërë këqyrjen e mjetit.

Ngjarja e rëndë ndodhi një ditë më parë, rreth orës 3 e 30 minuta në fshatin Sanxhak të Kurbinit dhe objekt i sulmit me lëndë plasëse ishte banesa e Skënder Likës.

Shpërthimi ishte i fortë duke shkaktuar dëme të shumta materiale dhe në objekte të tjera aty pranë, por fatmirësisht nuk pati persona të lënduar.