Shpërthimi në Shkodër, hoteli në pronësi të kreut të PD-së. Dëshmia: S’ka lidhje me mua

Reklamës së një biznesi hotel-bar-restorant në Razëm, në pronësi të një drejtuesi lokal të Partisë Demokratike, i është vënë plasëse. Nga shpërthimi, nuk raportohet për persona të lënduar.

Siç bën me dije policia, shpërthimi është shënuar rreth orës 08:50, në Razëm, një fshat turistik në Malësinë e Shkodrës.

“Dyshohet se është hedhur lëndë plasëse tek reklama, në afërsi të lokalit të shtetasit F.S. Si pasojë e shpërthimit të saj janë shkaktuar vetëm dëme materiale”, thuhet në njoftimin paraprak të policisë lokale lidhur me rastin.

“Grupi hetimor po kryen veprimet në vendngjarje, për sigurimin e provave, me qëllim identifikimin dhe kapjen e autorit/ve”, shton më tej policia.

Ndërkaq, burime pranë grupit hetimor thanë se një nga pistat ku po hetohet janë konfliktet e mundshme në fushën e biznesit mes konkurrentëve. Kjo, nisur edhe nga vendosja e lëndës plasëse në reklamën e biznesit, që dyshohet të jetë një paralajmërim për pronarin.

Dëshmia

Megjithatë, ky i fundit ka mohuar të ketë pasur ndonjë konflikt, ndërsa në një prononcim për mediat, ka shpjeguar se shpërthimi ndodhi larg pronës së tij dhe s’ka lidhje me të.

Biznesi është në pronësi të Ferdi Sterkajt, kryetar i Partisë Demokratike në Malësinë e Madhe, njëkohësisht edhe ish-kryetar i ish-komunës Shkrel.

Sipas të dhënave në Qendrën Kombëtare të Biznesit, bëhet fjalë për “Kulla e Artë”, me objekt aktiviteti ‘Bar restorant, hotel, pishinë”, i regjistruar në QKB në Tetor 2017, me Ferdi Stërkajn pronar të vetëm.

“Lënda plasëse nuk ka lidhje me mua”, u shpreh ai në një reagim për mediat.

“Tritoli është vendosur në një parking publik i zonës së Razmës që nuk është pronë e imja. Nuk kam asnjë konflikt dhe ky shpërthim me lëndë plasëse nuk lidhet me mua. Parkingu është i shkëputur nga biznesi im dhe prona ime. Aty afër parkingut ndodhet vetëm një reklamë, por është pronë publike e përbashkët. Nuk kam probleme dhe nuk kam patur asnjë kërcënim apo konflikte. Shpresoj që policia ta zbardh se me çfarë lidhet kjo ngjarje dhe të gjenden autorët”, shtoi.