Policia e Tiranës ka goditur një grup që trafikonte armë zjarri nga Kosova në Shqipëri, ku gjatë aksionit u arrestuan 4 persona, pranë terminalit të autobusëve të juglindjes në Tiranë. 10 armë zjarri u sekuestruan nga agjentët e policisë.
Sipas hetimeve, këto armë ishin trafikuar nga Kosova drejt Tiranës nga 4 të arrestuarit. Këta të fundit janë Blerim Krasniqi, 28 vjeç, Benjami Shala, 20 vjeç, Edonis Thaçi, 25 vjeç, dhe Muhamed Krasniqi, 20 vjeç, të gjithë banues në Kosovë. Sipas policisë, pistoletat ishin vendosur brenda një çante që ishte futur në autobus për t’u transportuar. Personat e përfshirë kishin ndjekur me makinë autobusin deri në destinacionin final, ku më pas morën çantën.
Policia e Tiranës thotë se ka dyshime që pronari i linjës së autobusëve së bashku me persona të tjerë kanë trafikuar armë drejt Shqipërisë edhe në disa raste të tjera. Armët mendohet se do të shiteshin kundrejt një vlere 1500-3000 Euro.
Burime zyrtare nga blutë thanë se aksioni i koduar “Transportuesi 2” u krye nga seksioni për Hetimin e Trafiqeve të Paligjshme, në bashkëpunim me Seksionin për Operacionet Speciale në DVP Tiranë, në kuadër të një procedimi penal të ndjekur me metoda speciale të hetimit në drejtimin e Prokurorisë së rrethit.
“Benjami Shala dyshohet se ka vënë në autobusin me drejtues Edonis Thaçin, një çantë brenda së cilës u gjetën 10 armë zjarri pistoleta, 10 krehra dhe sasi municioni luftarak. Më pas, Blerim Krasniqi, në bashkëpunim me Muhamed Krasniqin, kanë ndjekur me automjetin e tyre, autobusin, gjatë gjithë itnerarit. Nga verifikimet e kryera ka rezultuar se armët e zjarrit ishin trafikuar në Tiranë, me qëllim shitjen në vlerat 1500-3000 euro. Po nga verifikimet e kryera dyshohet se pronari i linjës së autobusëve, Edonis Thaçi, së bashku me shtetas të tjerë, ka trafikuar armë zjarri drejt Shqipërisë, në disa raste. Në cilësinë e provës materiale u sekuestruan 10 armë zjarri pistoleta, me krehra dhe municion luftarak, 1 automjet dhe 5 celularë”, thuhet më tej në njoftimin e bluve.
Discussion about this post