Nënkryetari i LSI, deputeti Petrit Vasili ka reaguar lidhur me artikullin e tabloidit britanik “The Sun” që shkruante se vendi ynë do të kthehej në një kamp refugjatësh për të gjithë emigrantët e paligjshëm që kapen në Angli.
Vasili thotë se kjo marrëveshje vendos sovranitetin në rrezik e se kryeministri Rama po e bën këtë në mënyrë që të mbijetojë politikisht.
“Sovraniteti në rrezik: Rama do të marrë edhe emigrantët e paligjshëm të Anglisë! Për mbijetesën e tij politike Edi Rama është i gatshëm për gjithçka. Mediet angleze zbulojnë skandalin! Edi Rama do të marre emigrantët e paligjshëm që hyjnë në Angli që të qëndrojnë në Shqipëri deri sa të merret vendimi përfundimtar për ta. Edi Rama që detyron qindra mijëra shqiptarë të largohen nga vendi shqyen dyert për gjithfarë refugjatesh anë e mbanë globit. Politika shkombëtarizuese e Edi Ramës nuk ka të ndalur.
Nënkryetari i LSI shkruan ndër të tjera, se kryeministri po i detyron shqiptarët që të largohen nga vendi, ndërkohë që po u ofron “parajsën” emigrantëve.
“Deviza e tij është: të kthejë Shqipërinë në një ferr për shqiptarët dhe në parajsë për emigrantët e paligjshëm dhe çdo lloj të huaji tjetër që nuk ka zë, nuk ka gojë, dhe nuk ka votë. Këto janë ditë kritike për vendin, që qeveriset nga armiku më i egër dhe i pamëshirshëm i shqiptarëve Edi Rama”, shkruan Vasili.
Tabloidi britanik “The Sun” njoftoi se të gjithë klandestinët që do të kapen në Britaninë e Madhe dhe kërkojnë azil, fillimisht do të sillen në Shqipëri, ku do të ngrihet një qendër pritjeje. Biseda për këtë çështje është bërë gjatë vizitës së ministres së Brendshme britanike, Priti Patel, javë më parë në Shqipëri.
