Deputetja demokrate Jorida Tabaku ka reaguar pas deklaratës së kryeministrit Edi Rama lidhur me samitin e BE-së në Bruksel. Kryeministri deklaroi se me shumë mundësi do të dëgjojnë një “jo” në Samit dhe ngriti pyetjen se për çfarë duhet të merrte pjesë.
Në reagimin e saj Tabaku e quan Ramën një kryeministër autokrat dhe Shqipërinë vendin më të korruptuar në Evropë.
“Serbia nuk do të ulet si pasojë e kundërshtisë për sanksionet kundër Rusisë, RMV është duke u penguar nga problemet bilaterale me Bullgarinë, po Shqipëria përse refuzon BE? Kryeministri më autokrat në rajon, vendi më i korruptuar në Europë nuk dëshiron integrimin në BE ku kontrolli do jetë më i fortë. Po sikur ta ndërtojmë BE tonë këtu pavarësisht një date e një procesi që sot edhe prej Ramës është larguar kaq shumë?”, shprehet Tabaku.
Kryeministri Rama më herët bëri me dije se sot diskutoi me Vuçiç dhe Kovaçevskin duke thënë se me shumë mundësi vendi ynë nuk do të marrë pjesë në samit. Liderët e gjashtë vendeve të Ballkanit Perëndimor janë ftuar në Bruksel në ditën e parë të Samitit të Liderëve të BE-së, që do të mbahet më 23 dhe 24 qershor.
Discussion about this post