Kombëtarja e Shqipërisë ka pësuar një humbje të thellë 5-0 në “Wembley” në një sfidë ku kërkohej mrekullia nga kuqezinjtë por që fatkeqësisht përfundoi në një natë traumatike. Shqipëria u dorëzua pa kushte ndaj Anglisë duke i thënë lamtumirë kualifikimit në Botëror.
Shqipëria e nisi mirë takimin duke u pozicionuar në gjysmëfushën e Anglisë por pa patur forcën e duhur për të rrezikuar vendasit të cilët filluan të kontrollonin lojën.
Në minutën e 9 të takimit Gjasula shkakton një faull të panevojshëm nga ku nisi edhe aksioni i golit të parë. Maguire kalon në avantazh vendasit pas asistit të James.
Më pas Shqipëria kreu dy zëvendësime të detyrueshme duke u larguar nga loja Bare dhe Kumbulla për shkak dëmtimi teksa në lojë u inkuadruan Laçi dhe Dermaku. Për Shqipërinë kishte mundësi të shkëlqyer shënimi sulmuesi Uzuni por humbi një shans të artë përballë Pickford.
Vendasit tregohen të pamëshirshëm teksa dyfishojnë shifrat me Kane në të 18 minutë ndërsa 10 minuta më pas shënojnë edhe golin e tretë me Henderson.
Shqipëria është e pafuqishme përballë Anglisë që realizojnë edhe të katërtin në minutën e 33 me autor Harry Kane që përfitoi nga vendosja e gabuar e mbrojtjes kuq e zi si dhe pakujdesia e portierit Strakosha.
Spektakli i Kane nuk u mbyll këtu pasi në fundin e pjesës së parë realizoi tripletën personale. Një ndeshje thuajse perfekte e Anglisë që ka dominuar totalisht 45 minutat e para. Rezultati mbeti i pandryshuar deri në fundin e takimit me Shqipërinë që për fatin e mirë nuk pësoi gola të tjerë. Në këtë mënyrë merr fund shpresa e kuqezinjve për kualifikim në kampionatin Botëror të Katarit.
Discussion about this post