Kombëtarja U-21 do të ketë dy takime miqësore në muajin mars. Departamenti i Komunikimit pranë Federatës Shqiptare të Futbollit bën me dije se janë konfirmuar tashmë dy kundërshtarët e radhës me të cilët do të përballen kuqezinjtë e drejtuar nga Alban Bushi më 23 dhe 27 mars.
Miqësorja e parë e Shqipërisë U-21 do të jetë kundër Azerbajxhanit më 23 mars, ndërsa takimi i rradhës do të jetë ai kundër polakëve, katër ditë më vonë. Të dyja këto ndeshje do të zhvillohen në Antalia të Turqisë, ku kuqezinjtë do të grumbullohen që në datën 21 mars dhe do të qëndrojnë 7 ditë.
Trajneri, Alban Bushi do të ketë kështu mundësinë të provojë grupin që ka aktualisht në dispozicion, por edhe futbollistë të rinj që vijnë nga ekipet zinxhir të moshave e që mund të bëhen në vijim pjesë e Shqipërisë U-21 në kualifikueset e Europianit të ardhshëm. Duke qenë se këto janë data zyrtare të FIFA-s, shumë ekipe kombëtare do të grumbullohen në Turqi dhe do të shfrytëzojnë këto ditë për të matur forcat me njëra-tjetrën.
Eliminatoret e Kampionatit Europian U-21 do të nisin në shtator, ndërkohë që ekipi i drejtuar nga Alban Bushi do të nisë përgatitjet që prej muajit mars me këto dy miqësore tashmë të zyrtarizuara si dhe dy ndeshje të tjera miqësore në muajin qershor të cilat do të konfirmohen më vonë. Këto përgatitje deri në nisjen e kualifikueseve zyrtare do t’i shërbejnë kuqezinjve në misionin kualifikues për Euro 2025 ku Shqipëria U-21 është shortuar në Grupin E së bashku me Rumaninë, Zvicrën, Finlandën, Malin e Zi dhe Armeninë.
Discussion about this post