Kur në Shqipëri ka nisur festa dhe qeveria ka hapur shampanjën për hyrjen e përkohshme të vendit tonë si anëtar në Këshillin e Sigurimit në Organizatën e Kombeve të Bashkuara, raportimet e mediave ndërkombëtare e ‘ulin’ hovin për ngjarjen e madhe.
Agjencia e lajmeve Reuters, shkruan se bashkë me Shqipërinë, Asambleja e Përgjithshme e OKB ka zgjedhur edhe Brazilin, Gabonin, Ganën dhe Emiratet e Bashkuara, si anëtare të përkohshme. Ajo që bie në sy është numri i votave që Shqipëria ka marrë në raport me vendet e tjera garuese. Vendi ynë ka marrë numrin më të ulët të votave, 175, ndërsa vendet e tjera janë votuar me diferencë të ndjeshme nga Asambleja e OKB.
Gana mori 185 vota, Gaboni 183 vota, Emiratet e Bashkuara Arabe 179 vota, Shqipëria 175 vota dhe Brazili 181 vota.
Pse Shqipëria u votua kaq pak? A ka patur hezitim nga vendet anëtare të OKB për diplomacinë shqiptare? Kjo nuk dihet me siguri, por sigurisht që diplomacia e Gabonit, një vend që ndodhet në pjesën perëndimore të Afrikës në kufi me Kamerunin, ka funksionuar më së miri…
