Open Data Albania ka publikuar të dhënat lidhur me numrin e personave të huaj që punojnë në Shqipëri.
Sipas të dhënave, gjatë 15 muajve Janar 2020 deri Mars 2021, numri i të punësuarve të huaj ka ardhur në tkurrje, kjo edhe për shkak të rrethanave të krijuara gjatë izolimit nga Covid-19.
Në 15 muaj në vend punojnë 5.1% më pak të huaj ose 461 persona. Në Mars 2021, janë të deklaruar të punësuar 8 573 individë ose 1.23 % e totalit të punësimeve.
Statusin e “të punësuarit” e marrim të gjithë ata që janë të deklaruar në sistemin e Tatim Taksave. Të huajt mund të punësohen në vend duke u pajisur më parë me një leje pune që jepet nga autoritetet shqiptare. Ndërsa kemi numrin e të huajve të punësuar dhe deklaruar në vend, nuk kemi asnjë të dhënë mbi origjinën apo shtetësisë sikurse për sektorin apo profilin e tyre profesional.
Nga ana tjetër, ndërsa të huajt vijnë të punojnë në Shqipëri, qytetarët tanë largohen drejt BE apo vendeve të tjera perëndimore për kushte më të mira jetese. Shëndetësia, shkollimi, shërbimet shoqërore dhe në përgjithësi përmirësimi i cilësisë së jetës janë bërë kërkesa kryesore që motivojnë emigrimin e të rinjve jashtë Shqipërisë.
