Ministria për Evropën dhe Punët e Jashtme ka njoftuar masat e reja të vendosura nga qeveria e Kosovës, për hyrjet dhe daljet në pikat e kalimit kufitar.
Sipas njoftimit të ministrisë, duke nisur nga data e sotme deri më datë 13 shtator, çdo person i cili hyn në Kosovë duhet të jetë i pajisur me certifikatën e vaksinimit të plotë ose marrjen e një doze të vaksinës kundër Covid-19 dhe një test RT-PCR negativ, vlefshmëria jo më shumë se 72 orë nga bërja e testit.
Nga ky rregull përjashtohen:
-Personat të cilët hyjnë në Kosovë përmes aeroportit apo përmes pikave kufitare tokësore dhe largohen nga Kosova brenda 3 orëve, përmes aeroportit ose pikave kufitare tokësore, me kusht që në hyrje të nënshkruajnë deklaratën se do të largohen nga Kosova brenda 3 orëve;
-Personat, të cilët punojnë si transportues profesionist (vozitës), me kusht që të respektojnë protokollin për transport ndërkombëtar për mbrojtje nga COVID-19;
-Shtetasit e Republikës së Kosovës që kanë dalë jashtë Kosovës në 12 orët e fundit;
-Qytetarët e huaj, të cilët kalojnë në Kosovë përmes transportit të organizuar me autobus ose me linjë të rregullt ndërkombëtare, tranzit, me kusht që të nënshkruhet deklarata se do të largohen nga territori i Kosovës, brenda pesë orësh;
-Diplomatët e huaj, të akredituar në Kosovë;
-Personat nën moshën 18 vjeç.
Nga këto masë u prekën edhe shtetasit shqiptarë, të cilët paraditen e sotme u kthyen pas në pikën e kalimit kufitar Morinë. Në shenjë revolte nga masat e ndërmarra, qytetarët kanë protestuar për disa minuta duke bllokuar kalimin e automjeteve drejt Shqipërisë.
