Ditën e sotme do të luhen një pjesë e rëndësishme e ndeshjeve të Premier League, Seria A dhe La Liga.
Në këto kampionate do të zbresin një pjesë e rëndësishme e lojtarëve shqiptarë. Southampton i Armando Brojës do të ndeshet në transfertë me Liverpool në orën 16:00 për raudnin e 13 të Premier League, ndërsa ende nuk dihet nëse talenti i Shqipërisë do të zbresë në fushë që nga minuta e parë e takimit.
Kjo sfidë ka për të qenë shumë e vështirë për ekipin e Brojës që aktualisht mban vendin e 13 në tabelë me 14 pikë, teksa kundërshtarët e tyre renditen në vend të 3 me 25 pikë të grumbulluara.
Po në të njëjtën orë do të zbresë në fushë edhe ekipi i yllit të përfaqësueses së Kosovës, Milot Rashicës, Norwich që do të përballet me Wolves. Shqiptari është një nga emrat kryesor të skuadrës së ‘kanarinave’ ndaj edhe sot pritet të jetë pjesë e formacionit startues.
Aktualisht Norwich renditet në vend të 19 me vetëm 8 pikë, teksa kundërshtarët e tyre qëndrojnë në vend të 6 të tabelës së Premier League me 19 pikë.
Në Seria A skuadra e tre shqiptarëve Nedim Bajramit, Ardian Ismajlit dhe Kristjan Asllanit do të përballet me Fiorentinën në orën 15:00 për javën e 14.
Empoli renditet aktualisht në vendin e 12 dhe të tre lojtarët ‘Kuqezi’ janë emra të rëndësishëm dhe vendimtar te ekipi italian dhe pritet që edhe në këtë përballje të vështirë të japin më të mirën e tyre. Ndërsa Fiorentina qëndron në vend të 7 me 21 pikë dhe vjen në këtë takim pas fitores ndaj Milan të vendit të parë.
Atalanta e Berat Gjimshitit do të përballet në transfertë me skuadrën e Juventus në orën 18:00 në një takim që pritet të jetë shumë interesant. Mbrojtësi i Shqipërisë e ka lënë pas dëmtimin tashmë dhe sot pritet që të zbresë në fushë që nga minuta e parë.
Skuadra ‘Zikaltër’ ka një ecuri pozitive, duke u renditur në vend të 4 të tabelës së Seria A me 25 pikë ndërsa kundërshtarët e tyre qëndrojnë në vend të 8 me 21 pikë.
Ndërsa në La Liga do të shohim ndeshjen e Valencias me Rayo Vallecano të Ivan Balliut. Kjo ndeshje do të zhvillohet në orën 16:15 dhe është e vlefshme për raundin e 15 të elitës së futbollit spanjoll. Balliu është një emër kryesor te Vallecano dhe në këtë sfidë pritet të jetë titullar./K.T/Gijotina.com
Discussion about this post