Vlonjati i njohur si “ujku” i kuzhinës greke Alsi Sinanaj njihet për suksesin e tij në gatim dhe për faktin se ka qenë shpesh herë i ftuar në emisione të ndryshme greke.
Në një lidhje me Skype me “ABC e Mëngjesit”, Alsi tregoi si i ka hyrë gatimit në moshën 15-vjeçare, duke theksuar se fillimisht nuk e ka çuar asnjëherë nëpërmend.
“Në 2017 hapa restorantin tim të parë në ishull me emrin “Ujqërit e kuzhinës”. Që në moshën më të vogël kisha një dashuri ndaj ujkut, si kafsha më e lashtë në tokë dhe e konsideroja veten dhe kuzhinierët që punojnë si ujqërit. E kam nisur që në moshën 15 vjeç dhe nuk ishte diçka që e kam pasur ëndërr. Ishte një moment në jetë që po kërkoja se çfarë do bëja në jetë dhe po kërkoja për punë. Hapa një gazetë dhe pash që po kërkonin një kuzhinier pa eksperiencë. Vajta dhe e provova dhe ajo që më dha ishte një dashuri me shikim të parë. Edhe filloi një dashuri shumë e madhe dhe nuk u ndava më kurrë nga kuzhina”.-u shpreh ai.
Ndërkaq, Alsi njihet edhe si kuzhinieri personal i yllit botëror të futbollit Cristiano Ronaldos, pasi dikur ka shërbyer për këtë të fundit. Vlonjati zbuloi edhe disa sekrete të CR7-ës dhe mënyrën e tij të të ushqyerit.
“Është njëri shumë i thjeshtë, pëlqen gjërat bio. Kuzhina mesdhetare i pëlqen shumë fare, ka regjimin ushqimor të tij, ha me vakte, stërvitet, pi shumë lëngje dhe ha shumë fruta. I pëlqen të jetë sa më i pastër, që do të thotë pa shumë përbërës, mjafton 2-3”.- tha ndër të tjera kuzhinieri shqiptar.
Ndërsa rikujtojmë se portugezi ndryshoi dietën e të ushqyerit të Manchester United që në darkën e parë që hëngri me skuadrën e re.
