Shkëlqim Rusi, vëllai i Adem Rusit, i burgosuri shqiptar që vari veten me lidhëse këpucësh brenda një furgoni burgu në Greqi, hedh dyshime se nuk është vetëvrasje, por se ai është vrarë.
Rusi ka thënë para mediave se të vëllait i kishte ngelur vetëm tre muaj burg, dhe nuk kishte pse të vetëvritej. Ai hedh akuza të fora se i vëllai është vrarë nga gardianët që e kanë shoqëruar.
“Unë kisha folur 3 orë para ngjarjes me vëllain në mënyrë private, më pas më morën në telefon dhe më thanë se e kemi dërguar në spital për vizitë mjekësore rutinë, më ka thënë drejtori i burgut. Pastaj më thanë që ka pirë klorinë dhe pas kthimit nga spitali vari veten me lidhësen e këpucëve. Kjo për mua është e pa pranueshme është vrasje. Vëllai kishte edhe 2-3 muaj burg që të mbaronte dënimin. Ai ka folur me të gjithë njerëzit dhe askush nuk e beson që është vetëvrasje, atë e kanë vrarë gardianët ata që e kanë shoqëruar. Ngjarja ka ndodhur në makinën e policisë, sepse ata thanë që ishte vetëvarur në kangjellën e furgonit, kjo është e papranueshme, nuk lejohet shoqërimi i të burgosurit me rrip apo lidhëse për më tepër je me pranga dhe i shoqëruar”, tha Rusi.
Ndër të tjera, ai kërkon që autopsia e të vëllai të bëhet në Shqipëri, ndërsa shtoi se kanë qenë në prokurori për të hapur hetimet, por prokurorët i kanë thënë që nuk kanë akses.
“Kjo është një përrallë, që thonë autoritetet greke. Ne kërkojmë që të bëhet autopsia këtu në Shqipëri, pasi presim të vijë këto ditë. Të bëhet autopsia pasi shteti jonë vetëm fle gjumë, janë vrarë shumë shqiptarë atje, pas vëllait tim mund ta ketë radhën dikush tjetër dhe nuk është zbardhur asgjë. Kemi shkuar në prokurorinë tonë dhe më kanë thënë që nuk kemi akses për hetime. Askush se merr përsipër, nuk duan belara, nuk di ç’të them. Ne duam të bëhet autopsia dhe të dalë e vërteta“, shtoi ai.
Ai gjithashtu shtoi se i vëllai nuk ka pasur probleme të shëndetit mendor siç është supozuar në mediat e huaja.
Discussion about this post