Partia Demokratike nuk i ndahet Berishës për incidentin në seli, duke i kujtuar opinionit se shoqëruesi i tij ka precedentë kriminalë. Në një tjetër reagim zyrtar, PD thotë se akti më i shëmtuar në 31 vite është kjo që bëri Sali Berisha ditën e sotme.
“Sjellja nga Sali Berisha në selinë e Partisë Demokratike e bosëve të krimit të organizuar, me në krye Fatjon Dautin, është akti më i shëmtuar që ka ndodhur në këto 31 vite të ekzistencës së PD”, theksohet në deklaratën e lëshuar pak më parë nga selia blu.
Selia e demokratëve nuk mund të sulmohet me trafikantë droge, vazhdon reagimi i PD-së.
“Kjo parti s’ka asnjë lidhje me trafikantët e drogës, as me bosët e krimit të organizuar. Përpjekjet për të zëvendësuar institucionet e partisë me aktet e dhunës së bosëve ndërkombëtarë të krimit të organizuar, janë akte tipike të një celule ilegale”, reagon Partia Demokratike.
PD i kujton Berishës se tashmë është jo legjitime çdo përpjekje e tij. “Institucionet e partisë kanë marrë vendimet e tyre, duke vendosur përfundimisht të zgjedhin të ardhmen, interesin e demokratëve, Partisë Demokratike dhe Shqipërisë”, shkruhet në deklaratën zyrtare.
“Fyerja e pashembullt nga Sali Berisha drejtuar 5004 anëtarëve të Kuvendit Kombëtar të PD, shumicës dërrmuese të këtij organi, duke i etiketuar si socialistë, ekstremistë të majtë, enveristë të thekur, është shprehja më e qartë që Sali Berisha ka zgjedhur të shkelë mbi çdo demokrat që i shërben interesit të demokratëve, interesit të PD dhe jo interesit personal të tij”, shprehet zyrtarisht PD.
Më tej përsëritet qëndrimi, se shumica dërrmuese e Kryesisë së Partisë, e Këshillit Kombëtar dhe e Kuvendit Kombëtar, “kanë zgjedhur të ardhmen dhe interesin e Partisë Demokratike, duke mos lejuar bunkerizimin e PD për hallet personale të askujt”.
Sot paradite mbështetës të Berishës hapën me dhunë sallën e mbledhjeve të Partisë Demokratike duke mbajtur të ndezur konfliktin në selinë demokratëve.
gijotina.com/
Discussion about this post