Disa zyrtarë kanë përfunduar pas hekurave, dhjetëra denoncime çdo ditë, gjetje negative nga KLSH dhe sërish inceneratorët vazhdojnë të thithin shumë para nga Buxheti i Shtetit. Vetëm në 6 muajt e për të këtij viti për tre inceneratorët në vend, që herë janë në funksion e herë jo, janë shpenzuar 103 milionë euro. Kështu tregojnë të dhënat me të fundit të përpunuara nga Open Data Albania.
“Që nga fillimi i projekteve, pagesat progresive për të tre inceneratorët, Elbasanit, Fierit dhe Tiranës, kapin vlerën totale 11 miliardë lekë (103 mln euro) deri në fund të qershorit 2023”, raporton “Open Data Albania”.
Inceneratori i Tiranës
Sipas këtyre të dhënave financimi inceneratorin e Tiranës ka arritur deri në 52.6 mln euro, ku rreth 5,5 milionë euro u dhanë në janar-qershor të këtij viti. Në tabelën më poshtë shihen edhe vlerat që janë kaluar nga buxheti i shtetit për firmën “’Integrated Energy BV SPV”, ku vetëm në muajin qershor janë dhënë 1.5 miliardë lekë.
Inceneratori i Fierit
Ndërkohë Inceneratori i Fierit ka marrë një shumë prej 3.5 miliardë lekësh sipas të dhënave të Ministrisë së Financave, ose rreth 33 milionë euro. Nga të dhënat e Open Data Albania rezulton se 44 milionë lekë i janë dhënë vetëm në muajin qershor. Ndërsa kjo shifër do të vazhdojë të rritet për çdo muaj në fund të vitit.
Gjithashtu, Open Data thekson se Kompania Integrated Technology Services nën sekuestro dhe nën administrimin e Farudin Arapit (administratori në emër të shtetit) me ortak Klodian Zoton ka marrë këtë vit edhe 2 milionë euro pagesa buxhetore për shërbimeve ndaj ndërmarrjeve të ujësjellësve sipas të dhënave nga thesari i Ministrisë së Financave.
Inceneratori i Elbasanit
Sakaq, të dhënat e mëtejshme tregojnë se për inceneratorin e Elbasanit janë bërë pagesa 1,9 miliardë lekë, rreth 18 milionë euro. Inceneratori i Elbasanit u ka kushtuar taksapaguesve 26 milionë euro. Ai u ndërtua nëpërmjet një kontrate të dyshimtë partneriteti publik privat që ka dërguar pas hekura me akuza për korrupsion dhe pastrim parash 10 persona, përfshirë ish-ministrin e Mjedisit Lefter Koka dhe ish-deputetin socialist Alqi Bllako.
Djegësi i mbetjeve u vendos në sekuestro preventive nga Gjykata në vitin 2021 dhe tani administrohet nga një kompani publike në pronësi të bashkive të qarkut Elbasan. Por megjithëqë përpjekjet e kësaj kompanie për ta rivënë në punë, impianti vazhdon të jetë jashtë funksioni.
Ndërkohë duhet të theksojmë se përveç parave që japin për inceneratorët, taksave për pastrimin, qytetarët në çdo qytetet paguajnë edhe paratë për tenderët e pastrimit që hapin sipas dëshirës bashkitë dhe në fund nuk japin asnjë efekt.
Sakaq në këto ditët e fundit SPAK ka marrë në dorë edhe çështjen e Arben Ahmetajt Lidhur me vjedhjet e inceneratorëve. Por, në fakt Prokuroria duhet t’u hedh e një sy transaksioneve që vazhdojnë të bëhet për inceneratorët që po pastrojnë para dhe jo mjedisin.
Lexo edhe: Gropa e koncesioneve, 108 MLN Euro u paguan në 2022, “Rruga e Arbrit” mban rekord
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post