Nja nga banorët e “5 Majit”, shtëpia e të cilit pritet të shembet sot, ka hipur mbi tarracë për të mos lejuar këtë masakër. Në një prononcim për mediat ai është shprehur se do të bëjë rezistencë dhe nuk lejon që t’i shembet shtëpia, vetëm nëse kalojnë mbi trupin e tij.
Nikolli thotë se forca të shumta të policisë po bëjnë masakër duke mbrojtur pushtetin, ndërsa shton se ai e ka shtëpinë e legalizuar dhe nuk është e dëmtuar aspak nga tërmeti.
“Jam Gjin Nikolli. Unë kam hipur sipër banesës sepse i kam bërë thirrje policisë që të më mbrojë pronën tonë për sot nga shembja e paligjshme. Policia as më ka njoftuar fare atëherë unë kam vendosur të mbroj pronën time. Mua nuk më ka ardhur vendim por njoftim për të liruar banesën, për sa kohë nuk ka një vendim për një pronë siç është e imja atëherë unë kam vendosur për të qëndruar sipër tarracës së shtëpisë.
Policia do të ndërhyjë me forcë sepse shihet numri i madh i efektivëve që kanë rrethuar zonën sikur kemi bërë ndonjë krim, thuaj sikur jemi në planet tjetër. Policia në vend që të na mbrojë por shkon nën urdhrat e pushtetit dhe kjo është katastrofë. Këtu po bëhet një masakër, këto pamje ne i kemi parë në Afganistan. Shteti është për ta sistemuar dhe jo për të na nxjerrë në rrugë të madhe. S’kisha asnjë vendim tjetër veçse të rri në shpinë time”, thotë banori.
Prej disa kohësh banorët e “5 Majit” por jo vetëm janë ngritur në protesta që kundërshtojnë shembjen e banesave të tyre. Ata kërkojnë marrëveshje me qeverinë për banesat e reja dhe dëmshpërblimin në proporcion të drejtë me pronat që kishin.
Discussion about this post