Situata në radhët e Partizanit sa vjen edhe vështirësohet. Të kuqtë nuk kanë gjetur ende fitoren e parë sezonale në kampionat teksa në shtatë javët e para kanë barazuar në pesë takime dhe kanë humbur dy.
Ndeshja ndaj Egnatias jo vetëm nuk u fitoi por u dëmtuan tre futbollistë të tjerë duke shtuar telashet për trajnerin Ilir Daja. Alban Hoxha, Damcevski dhe Maguette do të mungojnë për kryeqytetasit për disa ditë ndërsa koha e rikuperimit nuk është mësuar ende.
Kapiteni i “të kuqve” ka një problem në kockën e gishtit dhe pritet të mungojë rreth tre javë teksa do të rikthehet pas pauzës së kombëtareve. Sa i përket mbrojtësit Damçevski ka problem me brinjët dhe do të qëndrojë larg fushave për një muaj. Situatë e njëjtë edhe për Maguette që i shtohet listës së dëmtimeve. Një situatë kaotike tek të kuqtë të cilët po kalojnë një moment shumë të vështirë.
