Çmimi naftës që po arrin shifra rekord çdo ditë ka detyruar shoqatat e transportit që të rrisin kostot e biletave. Çmimi i biletës për të udhëtuar nga Tirana për në Korçë është rritur ditët e fundit me 100 lekë. Udhëtarët tregojnë se para disa ditësh ata paguanin 6 mijë lek të vjetra për të shkuar drejt kryeqytetit apo anasjelltas, ndërkohë sot paguan 7 mijë lek të vjetra.
Nga ana tjetër shoferët e autobusëve tregojnë se janë të detyruar për këtë rritje, pasi me këtë çmim të naftës sot nuk kanë asnjë lloj fitimi. “7 mijë lekë bileta, Më parë ne për në Korçë ishte 6 mijë lekë, por nuk varet nga ne, sepse edhe ne varemi nga dikush, paguajmë më shtrenjtë naftën. Populli ankohet dhe po reduktohen pasagjerët, nuk kanë faj se populli është i varfër. Se di se çfarë do bëhet por kështu po marrim fund.
Ne sot e rritëm sepse nuk përballojmë dot naftën, pasi edhe naftën një muaj më parë e paguanim gjysmën e çmimit që paguajmë sot. Shoqata e Transportit ka lënë takim me ministrinë përgjegjëse por ende asnjë përgjigje dhe ne nuk kemi asnjë rrugëzgjidhje”, tha një nga operatorët.
Shoqata e transportit publik në Shqipëri lajmëroi se gjithë biletat e udhëtimit do të rriteshin, ndërkohë kërkoi ndihmë nga qeveria shqiptare për lehtësira ekonomike. Kujtojmë se edhe linjat e Beratit me çdo qytet tjetër kanë rritur gjithashtu me 100 mijë lekë çmimin e biletave, ndërsa transporti urban kërkon të rrisë me 100% çmimet, madje ditën e djeshme kanë përgjysmuar flotën dhe u krijua kaos nga pritjet e qytetarëve.
Discussion about this post