Pas rritjes së çmimeve të produkteve në tregjet ushqimore, edhe baret e restorantet kanë rritur kostot e shërbimeve. Ndërkohë, vetë shoqata e restoranteve dhe bareve parashikon se rritjet do të vazhdojnë. Kreu i Shoqatës, Enri Jahaj, tha gjatë një interviste televizive se, kjo rritje vjen për shkak se janë shtrenjtuar çmimet e lëndëve të para. Por, gjithashtu këto kategori biznesesh kanë nevojë të plotësojnë mungesat e të ardhurave të krijuara nga pandemia.
“Janë rritur çmimet e lëndës së parë. Kafeja po rritet tani si lëndë e parë dhe do të reflektohet në disa rritje çmimesh. Po bëhet një rritje normale që do të vijë për të reflektuar të ardhurat e munguara apo fitimet e munguara sepse edhe klientela ka rënë në bare e restorante”, tha ai.
Jahaj tregoi se, çmimet do të vazhdojnë të rriten derisa të barazohen me nivelin e çmimeve në rajon. “Tregu do të vetërregullohet, jemi i vetmi vend në rajon që kemi çmimet më të ulëta të ofertës, kafes, ujit dhe ushqimit në baret dhe restorantet tona. Duhet të ketë vend për të shkuar në logjikën e rajonit, Kosovë dhe Maqedoni, ku krahasuar me ta, ne jemi 30% më lirë”, u shpreh ai.
Por, nga ana tjetër vetë qytetarët tregojnë se kanë të pamundur të përballojnë rritjen e çmimeve, sidomos pensionistët, pasi të ardhurat e tyre vazhdojnë të jenë shumë të pakta.
E.H/ gijotina.com/
