Ervin Salianji ka dhënë një deklaratë për mediat pasi Gjykata e Apelit shtyu seancën gjyqësore për rastin “Babale”. Ai shpreh bindjen se do të dalë i pafajshëm nga gjyqi, pasi çështja do të shkojë në të gjitha instancat ligjore.
“Çfarë do bëj? Do të hidhem përpjetë? Çdo vendim do të respektohem. po them me fakte e me prova që s’ka gjykatë që s’e merr parasysh. Sot ata nuk janë në sistemin gjyqësor që i bën të paragjykuar në vendimmarrje. Çështja do të shkojë në të gjitha instancat ligjore. Nuk mund të ketë dënim për denoncim publik. Kam bërë detyrën time si politikan…”, tha Salianji.
Kujtojmë se deputeti Ervin Salianji është dënuar nga Gjykata e Tiranës me 1 vit burg, por këtë dënim ai dhe Kryesia e Partisë Demokratike e konsideron politik. Apeli do të vendosë nëse do të lërë në fuqi vendimin e shkallës së parë, apo do ta shpallë të pafajshëm deputetin demokrat, i cili jo më larg se dje deklaroi se do të jetë prezent në çdo seancë gjyqësore.
Pranverën e 2018-ës, PD botoi 2 audioregjistrime, përmes së cilave supozonte se vëllai i ministrit të Brendshëm aso kohe, Fatmir Xhafaj, Agroni ishte i përfshirë në trafikimin e lëndëve narkotike. E tërë çështja u emërua “Babalja”, pasi dëshmitari X i Partisë Demokratike, i cili ishte i përfshirë në audioregjistrime, thirrej në to me pseudonimin Babale.
Asokohe Krimet e Rënda lëshuan urdhër-arreste për protagonistët e audiopërgjimit, Albert Veliu, i njohur ndryshe me nofkën “Babalja” dhe kunatin e tij, Fredi Alizoti. Nga ekspertiza që i është bërë kampionit të zërit, ai që dëgjohet në audio është i Agron Xhafajt, por i Alizotit, i cili pranonte se kishte imituar zërin e vëllait të ministrit, pasi iu ishin premtuar 200 mijë euro nga deputeti me mbiemrin Salianji.
Discussion about this post