Pas mbledhjes së Konferencës së Kryetarëve, kreu i grupit parlamentar të PS, Taulant Balla foli ndër të tjera për vendimin lidhur me prezencën në Komisione dhe shtyrjen e kërkesës së PD për ngritjen e Komisioneve Hetimore.
Para gazetarëve, Balla u shpreh se komisionet do të kthehen në objekt diskutimi në Kuvend, ndërsa propozoi që numri i anëtarëve të ulet për të qenë më efektiv.
“Komisionet Hetimore parlamentare janë një instrument në duart e opozitës për të hetuar çështje që pikë së pari kanë një interes publik. Puna e tyre rregullohet nga një ligj i posaçëm. Kërkesat janë depozituar në fund të javës së kaluar, kanë hyrë në diskutimin e konferencës së kryetarëve siç e parashikon dhe rregullorja. Do të hyjmë në një objekt diskutimi për temën e këtyre komisioneve. Mund t’ju them se sa më i vogël të jetë numri i anëtarëve të komisioneve, aq më efektive është puna. U duhet lënë edhe hapësirë deputetëve që nuk janë pjesë e grupeve parlamentare”.
Balla falenderoi opozitën për bashkëpunimin në mënyrën e organizimit të Komisioneve dhe detyrimin e vaksinimit për deputetët.
“Gjej rastin të falenderoj deputetët e opozitës që ramë dakord dhe për mënyrën e zhvillimin e mbledhjeve të Komisioneve duke vendosur Kuvendin në një linjë me universitetet dhe shkolla. Në këtë aspekt pjesëmarrja në komisione do të jetë fizike dhe çdo deputet duhet të jetë i vaksinuar ose të paraqesë testin që tregon se është negativ. Unë dua që t’i fillojmë diskutimet që sot, me dëshirën e mirë që kjo çështje të mos jetë pjesë e një pakete, por po punohet ende për një ndryshim shumë të vogël. Bëhet fjalë për një mandat shtesë 2-vjeçar”, tha Balla.
Në mbledhjen e sotme të Konferencës së Kryetarëve, u miratua kërkesa e opozitës për zhvillimin e mbledhjeve të Komisioneve fizikisht, dhe jo online. Ndër të tjera, u vendos të shtyhet kërkesa e PD për ngritjen e tre Komisioneve Hetimore, përkatësisht për zgjedhjet e 25 prillit, skandalin me inceneratorët dhe çështjen Bechetti.
