Fitorja e fundit që arriti Tirana në derbin me Dinamon, duket se ka sjellë qetësinë te bardheblutë. Kjo ka kënaqur shumë edhe presidentin e Tiranës, Refik Halili.
Skuadra e tij ka fituar dy takimet e fundit 5-0 ndaj Egnatias dhe 3-2 me përmbysje ndaj Dinamos. Për këtë qëllim, pronari i bardhebluve duket se ka vendosur që të shpërblejë ekipin.
Nëse skuadra ia del të fitojë tri takime rresht do të marrë një shpërblim. Kështu, nëse Tirana pas triumfit me Dinamon mund edhe Teutën dhe fiton në shtëpi me Skënderbeun, fiton 12 mijë euro shpërblim. Skuadra duhet të marrë të paktën tri fitore. Skuadra ka marrë edhe një shpërblim prej 10 mijë eurosh në sfidën me Egnatian.
Presidenti Refik Halili u ka deklaruar lojtarëve që investimi i janarit janë ata. Do të ruajë grupin dhe beson te të gjithë futbollistët që ka marrë në fillim të sezonit.
PËRMBYSJET – Tirana ka fituar tetë takime këtë sezon, ndërsa gjysmën e këtyre sfidave e ka marrë me përmbysje. Po, është shumë e vërtetë. Tirana ka mundur dy herë Dinamon 3-2, duke qenë në disavantazh, madje në sfidën e fundit me dy gola. Dy takimet e tjera ku bardheblutë kanë përmbysur rezultatin janë TiranaSkënderbeu e fazës së parë që u fitua 3-1 nga 26 herë kampionët. Korçarët kaluan të parët në avantazh, më pas Tirana shënoi tre gola. Përmbysja tjetër është ajo me Kukësin në “Air Albania”. Nënkampionët mundeshin 1-2 dhe brenda pak minutash çuan në rezultatin 3-2. Shkurt, Tirana është skuadra e adrenalinës.
Discussion about this post