Edmond Haxhia, i cili dyshohet si organizator i atentatit ndaj biznesmenit Ardian Nikulaj në Shëngjin është arrestuar sot nga policia në Britaninë e Madhe, së bashku me dy bashkëpunëtorët Thomas Mithan dhe Steven Hunt.
Policia ka rënë në gjurmët e tyre përmes telefonave, teksa 3 të arrestuarit kanë qenë në zona të afërta me njëri tjetrin. Polcia ka përgjuar telefonat me persona që kishin kontakt me ta dhe pasi ka zbuluar vendndodhjen, ka bërë të mundur kapjen.
Në lidhje me këtë ngjarje vijojnë të jenë në kërkim tre persona të tjerë. Ndërkohë britanikët dyshohen se në vrasjen e Nikulajt kanë pasur rolin e vëzhguesve të lëvizjes së viktimës, kurse portugezi Ruben Saravia, dyshohet se është ekzekutori i Nikulajt.
Haxhia është personi që ka porositur vrasjen e biznesmenit Ardian Nikulaj. Mësohet se Haxhia është djali i dajës së Elton Lekstakaj. Edmond Lekstakaj ka pasur konflikt me Nikulajn që në vitin 1998.
Haxhia kishte organizuar gjithçka, duke përfshirë në vrasje kryesisht shtetas të huaj. Një anglez ka parë lëvizjet e Ardian Nikulajt në lokal, ndërsa ekzekutimi u krye nga ana e portugezit, raporton Replika.al.
Ardian Nikulaj u ekzekutua mesditën e 19 prillit kur sapo kishte hyrë dhe ulur në një tavolinë në lokalin në pronësi të tij në vijën e parë të plazhit të Shëngjinit. Autori, siç u pa nga pamjet, mbante një maskë kirurgjikale, skafandër dhe jelek fosforeshent. Ai futet në lokal, qëllon me armë Nikulajn dhe pasi kryen vrasjen me pistoletë në një distancë shumë të afërt largohet qetësisht me motor nga vendngjarja.
Nikulaj ishte biznesmen në Lezhë, ish-kandidat për deputet në zgjedhjet e 2021-shit dhe kandidat për Këshill Bashkiak në zgjedhjet e 14 majit. Viktima rezulton i arrestuar më herët për armëmbajtje pa leje dhe kontrabandë e falsifikim, ndërkohë që pista ku po hetohej është ajo e gjakmarrjes. Kjo pasi Nikulajt i është vrarë një vëlla nga pjesëtarë të fisit Balaj.
Discussion about this post