Sipas një studimi të Institutit të Shëndetit Publik, 194 persona kanë humbur jetën si pasojë e aksidenteve në vendin e punës gjatë periudhës 2018-2023. Ndërsa në Bashkimin Europian 1 në 1000 aksidente rezulton fatal, në vendin tonë ky raport është dukshëm më i lartë, me 1 në 6 aksidente që përfundon me humbjen e jetës së punëtorit.
Ekspertët theksojnë se numri real i aksidenteve mund të jetë më i madh, pasi shumë raste nuk raportohen pranë autoriteteve. Shpeshherë, ngjarjet zgjidhen në mënyrë private mes punëdhënësve dhe familjeve të viktimave, ku këto të fundit, për shkak të presionit social, ndikimit të punëdhënësit apo mungesës së besimit te institucionet, hezitojnë të bëjnë denoncime.
Sektorët me rrezikun më të lartë përfshijnë industrinë minerare, ndërtimtarinë dhe sektorin energjetik. Përgjegjësinë kryesore për mbikëqyrjen e kushteve të punës e mbajnë Inspektorati i Punës dhe Instituti i Shëndetit Publik, por një qasje më gjithëpërfshirëse konsiderohet e domosdoshme. Angazhimi i agjencive qeveritare, universiteteve, mediave dhe shoqërisë civile në hartimin e një strategjie kombëtare për sigurinë në punë do të ndihmonte në krijimin e një mjedisi më të sigurt për punëtorët, duke reduktuar ndjeshëm rrezikun e aksidenteve fatale.
Discussion about this post