Sipas kreut të Sindikatës së Policisë, Sadedin Fishta, për gradat e nivelit zbatues ligji i Policisë së Shtetit iu njeh të drejtën të gjithë punonjësve që kanë mbi 10 vjet punë në polici, gradën “inspektor i dytë”, dhe mbi 15 vite punë, gradën “inspektor i parë”. Por V.K.M ka përcaktuar numrin e gradave të nivelit zbatues në polici, dhe janë 1.200 Inspektorë të Parë dhe 1800 Inspektorë të Dytë. Aktet nënligjore që kanë dalë parimisht dhe juridikisht, shkelin ligjin dhe Kontratën Kolektive. Para daljes së tyre duhet të ishin konsultuar me Sindikatën e Policisë së Shqipërisë. Para vitit 2015, trupa Policore e RENEA-s ka patur gradën krye-inspektor dhe inspektor të barasvlershme me inspektor i dytë dhe inspektor i parë. Sot çuditërisht iu mohohet një e drejtë e fituar me ligj, shumë vite më parë, edhe pse kemi ngritur padi që në 2015 kundër heqjes së tyre, si një e drejtë e fituar dhe zbatuar sipas Kodit të Punës, për më shumë se tre vjet.
Më tej, Fishta sqaron se: – “Ligji në fuqi e korrigjoi këtë problematikë, pasi u ndryshua duke shtuar dhe dy grada, pra iu ktheu këtë të drejtë, duke përcaktuar dhe moshën e përfitimit të gradave, por aktet e dala në zbatim të ligjit, praktikisht po ua mohojnë këtë të drejtë.”
Ditën e sotme, efektivët e RENEA-s, pjesë e Policisë së Shtetit, paralajmëruan se do të protestojnë pasi ndihen të mashtruar nga premtimet e qeverisë se do u rritet paga e se do të marrin grada. Efektivët paralajmërojnë se nëse nuk do të realizohen kërkesat e tyre, do të dalin në protestë para Ministrisë së Brendshme.
“Na kanë mashtruar me gradat dhe pagat. Do të protestojmë para Ministrisë së Brendshme, na bashkohet ‘Sindikata’. Na kanë barazuar me kursantët e Akademisë. Jemi mashtruar, po na trajtojnë si student akademie”- thonë ata për mediat.
Discussion about this post