Sindikata e Pavarur e Arsimtarëve të Shqipërisë ka dalë në mbështetje të tyre dhe i kërkon qeverisë t’i mbulojë shpenzimet për tamponët përmes të cilëve duhet të vërtetojnë çdo javë se nuk janë të infektuar. Disa sapo e kanë kaluar Covid –in, të tjerë kanë probleme shëndetësore apo janë në pritje të një fëmije. Një pjesë e mësuesve për arsye të ndryshme hezitojnë të vaksinohen me detyrim kundër koronavirusit.
Isa Halilaj, numri dy i Sindikatës së Arsimtarëve ka bërë thirrje për forcim të rolit të mjekut të familjes.
“I njeh të gjitha sëmundjet e pacientëve të vet. Do të thotë, duhet të jetë mjeku i familjes ai që duhet të vendosë, do të vaksinohet apo jo” – është shprehur Halilaj.
Gjysma e arsimtarëve shqiptarë në sistemin publik dhe privat kanë marrë një apo dy doza anti-Covid. Që pas 30 shtatorit mësuesit nuk mund të paraqiten në shkollë pa kartë vaksinimi apo pa tampon. Këtë të fundit duhet ta kryejnë privatisht një herë në javë.
