Manchester Siti udhëton në transfertë ndaj PSG këtë të martë në ndeshjen e vlefshme për ligën e kampionëve. Trajneri i kampionëve në fuqi të Anglisë, Pep Guardiola ka theksuar se nuk ka asnjë ide për të ndalur sulmin e frikshëm të PSG, Mesi-Nejmar-Mbappe. Në lidhje me transferimin e Messit në Francë, Guardiola u shpreh:
“Ishte një surprizë por tashmë e ka pranuar e gjithë bota. Deri pak vite më parë, askush nuk do ta kishte imagjinuar. Në futboll askush nuk e di se çfarë mund të ndodhë në një periudhë afatshkurtër. Lojtarë të tillë flasin për veten në fushën e lojës, nuk kam çfarë të shtoj më shumë. Kemi qenë me fat që e kemi parë në gjithë këto vite. Ajo që ka arritur në karrierën e tij është mëse e jashtëzakonshme, shpresoj që nesër të luajë për të mirën e futbollit.
Treshja Mesi-Nejmar-Mbape? Janë të jashtëzakonshëm. Si t’i ndalim? Nuk e di, janë shumë të mirë. Talenti është shumë i vështirë të kontrollohet. Do të mundohemi të mbrojmë mirë kur të mos kemi topin.
Barcelona e Luis Enrikes kishte lojtarë të pabesueshëm përpara. Ky PSG ka lojtarë përpara të të njëjtit nivel por futbolli ka nevojë për kohë, edhe pse shpesh njerëzit nuk ta japin. Prej shumë vitesh PSG ka pasur lojtarë shumë të mirë. PSG është gjithmonë një konkurrues i fortë. Duhet të mbrohemi si ekip, nuk mund të lejojmë presionin e mbrojtjes me një futbollist të vetëm, duhet ta bëjmë të gjithë bashkë”, tha Guardiola.
