Burime për mediat e Kosovës, bëjnë më dije se një zëdhënës i Ambasadës së SHBA-së në Prishtinë ka konfirmuar gjatë kësaj jave do të ketë takim në Bruksel mes përfaqësuesve të Kosovës dhe Serbisë, takim në të cilin do të marrë pjesë edhe zëvëndës ndihmësi i sekretarit të Shtetit, Gabriel Escobar.
Takimi në Bruksel vjen pas situatës së krijuar në veri të Republikës së Kosovës, me vendosjen e reciprocitetit të targave.
“Ne jemi të kënaqur që Serbia dhe Kosova do të dërgojnë përfaqësues në Bruksel këtë javë për diskutime dhe inkurajojmë të dyja palët që të ri-angazhohen hapur, seriozisht dhe menjëherë. Zëvendës Ndihmës Sekretari i Departamentit të Shtetit për Çështjet Evropiane dhe Euroaziatike, Gabriel Escobar, do të udhëtojë në Bruksel këtë javë për të marrë pjesë në këto diskutime” – ka thënë ky zëdhënës i Ambasadës së SHBA në Prishtinë.
Kujtojmë që faktori ndërkombëtar ka bërë thirrje për ulje të tensioneve nga të dyja palët dhe kthimit tek dialogu.
