Në pikën kufitare të Jarinjës, ashtu sikurse edhe në pikat e tjera kufitare të Kosovës me Serbinë, ka filluar të zbatohet aplikimi i marrëveshjes për mbulimin e simboleve shtetërore në targat e makinave.
Lidhur me situatën aktuale dhe zbatimi i marrëveshjes në terren ka folur për Report Tv, Ministri i Brendshme i Kosovës Xhelal Sveçla. Ai theksoi se marrëveshja po zbatohet me përpikmëri dhe se janë “luftuar” tashmë të gjitha problemet që u shfaqën.
“Realisht vendimi i qeverisë për reciprocitetin me Serbinë dhe marrëveshja e arritur në Bruksel tani po zbatohet më përpikmëri, në të gjithë pikat kufitare për sa i përket targave të përkohshme mes Kosovës dhe Serbisë. Është zbatuar pa probleme përveç pikës në Bërnjak dhe Jarinjë ku kemi dëshmitarë që ka pasur bllokada të organizuara nga struktura paralele të Serbisë me kamionë të kompanive publike. Tashmë kjo situata është tejkaluar”, tha ai.
Sveçla u shpreh se angazhimi i KFOR-it DHE EULEX-it është maksimal në kufi, ndërsa në 24 orët e fundit kanë kaluar 2242 kamionë e vetura, të cilat u pajisën me njësinë për të mbuluar flamurin dhe simbolet.
“Duke filluar nga përgatitja logjistike, masat e ndërmarra edhe në aspektin e sigurisë në pikat kufitare dhe mobilizim e resurseve të duhura. Është i angazhuare edhe KFOR-i edhe EULEX-i. Unë isha në dy pikat Bërnjak dhe Jarinjë dhe çdo gjë është siç e kishim planifikuar. Në 24 orët e fundit 2242 vetura janë pajisur me ngjitës të cilat mbulojnë flamurin”, shtoi ai.
Duke folur lidhur me situatën e tensionuar të ditëve të fundit, ai tregoi se policia dhe forcat e njësisë speciale kanë qenë në krye detyrës prej fillimit, ndaj dhe siç theksoi ai nuk ka pasur asnjë incident serioz, përveç provokimeve që vinin nga pala serbe dhe ruse.
