Për të dytën ditë përmbytjet vazhdojnë nga stuhia Daniel, i cili pas asaj që ndodhi dje në Volos, sot ka prekur më shumë zona të territorit ku goditjen më të madhe e kanë marrë Kardita, Fthiotida dhe Evia.
Sipas Protothema.gr, u bë e ditur pak pas orës 10:30 nga forcat zjarrfikëse greke, një 87-vjeçare është gjetur e pajetë në zonën e Paltsit në Magnezi, me informacionin se gruaja fatkeqe është gjetur në një grumbull drush.
Për shkak të reshjeve intensive janë shkaktuar fenomene përmbytjesh, duke detyruar autoritetet të vijojnë me evakuimin e fshatrave, ndërsa është dashur të ndërpritet qarkullimi në një pjesë të autostradës Larisa-Kardicë.
Sidomos për Sofiadën, ku është kërkuar evakuimi i saj, qasja në fshat është ndërprerë dhe afrimi i EMAK, për të evakuuar rreth 200 banorët e fshatit, bëhet vetëm me varka.
Lëvizja e stuhisë më në perëndim, nga prefektura e Magnezisë në Kardicë, i ka transferuar problemet në pllajën e Domokosit në Fthiotidë, ndërsa në të njëjtën kohë vërehen probleme të theksuara në anën lindore dhe veriore të Evias.
Fusha e Domokosit është përmbytur, pasi të gjithë përrenjtë janë fryrë dhe ujërat kanë rënë në zonën e Neos Monastiriou dhe Sofiada, tashmë janë shënuar dëme në magazina të përmbytura dhe ferma të shpërndara, ndërsa probleme ka edhe në Glyfa.
Discussion about this post