Sjell vërdallë policinë prej muajsh, kush është shkodrani që i vë gjoba biznesmenëve

Mëngjesin e sotëm policia e Tiranës njoftoi mbi arrestimin e 4 personave, ndërsa dy të tjerë janë shpallur në kërkim, si pjesë e një grupi kriminal, që nëpërmjet mashtrimit u marrin shuma të konsiderueshme biznesmenëve të ndryshëm, duke u prezantuar si përfaqësues të zyrtarëve shtetërorë.

Policia njoftoi se kishte arrestuar Xhonatan Xhaferri, Leonard Xhika, Petro Ferzaj dhe Mikel Panxhi, ndërsa janë shpallur në kërkim Xhensil Qefa dhe Florian Gjergji.

Ky i fundit prej muajsh është shpallur në kërkim nga Policia, madje emri i tij rezulton i përfshirë në disa raste mashtrimi, ku ai prezantohet si përfaqësues i zyrtarëve shtetërorë.

Skema thuajse është e njëjtë: i kontakton përmes aplikacioneve, në Signal apo telegram, në numrat e telefonit, ku i tregon për lidhjet që ka me ministra, politikanë, kryebashkiakë apo zyrtarë të tjerë, duke u premtuar fitimin e tenderave dhe në këmbim kërkon shuma të mëdha parash.

Prej janarit të 2023, kohë kur Gjykata e Tiranës i ka caktuar masën e sigurisë “arrest me burg”, ndërsa Policia e kërkon, Florian Gjergji herë pas here aplikon skemën e mashtrimit, duke u kthyer në një tmerr për biznesmenët.

Dyshimet janë se ai vepron nga jashtë vendit, duke çuar mesazhet, më pas në takimet që fiksohen me biznesmenët paraqiten të tjerë persona, si të dërguar të tij.

Deri më tani Policia ka mundur të arrestojë vetëm personat që paraqiten në takimet me biznesmenët për të marrë shumat e kërkuara, ndërkohë që nuk ka mundur të bjerë në gjurmët e shkodranit, që cilësohet si koka e grupit të mashtrimit.

Rasti i fundit ishte i pak ditëve më parë, ku përmes një mesazhi telefonik i mbëritur në aplikacionin “Signal”, Florian Gjergji, për pak sa nuk ka futur në kurth biznesmenin e ndërtimit Alban Eftimi, person ky i lidhur ngushtësisht me kryetarin e Bashkisë së Tiranës, Erjon Veliaj dhe kryeministrin e vendit Edi Rama.

Referuar raportimeve janë të paktën 4 raste kur biznesmenë të mëdhenj janë tentuar të mashtrohen, ndërsa Policia ka arrestuar 11 persona të përfshirë në skemën e mashtrimit, por që janë thjesht njerëz që paraqiten për të marrë paratë.