Presidenti Bajram Begaj, në krye të një delegacioni, është nisur drejt New York, ku do të marrë pjesë në mbledhjen e Asamblesë së OKB-së.
Sipas njoftimit zyrtar Begaj do të kryesojë delegacionin shtetëror të Republikës së Shqipërisë, që do të marrë pjesë në javen e punimeve të Sesionit të 78-të të Asamblesë së Përgjithshme te Kombeve te Bashkuara.
Së bashku me kryetarët e shteteve/qeverive të 193 vendeve anëtare të OKB-së, Presidenti Begaj do të mbajë fjalën, në cilësi kombëtare, në Debatin e Përgjithshëm të AP të Kombeve të Bashkuara.
Dhe përtej çdo aktiviteti ku Presidenti do të marrë pjesë do të mbajë edhe fjalime, do të ketë takime dypalëshe, të cilat sigurisht që do të jenë shumë të suksesshme, tërheq vëmendjen lista e personave që do të shoqërojnë Kreun e Shtetit në këtë vizitë.
Mes emrave të stafit të tij, njerëz shumë të nderuar me pozicione të rëndësishme në Presidencë, që e këshillojnë apo kujdesen për imazhin, është edhe emri i një zonje.
Ajo renditet e 12 në listën që shoqëron kreun e shtetit, quhet Lili Ismaili, dhe rezulton se është këshilltare e jashtme e Presidentit. Deri këtu nuk ka asgjë të keqe, pasi shtetarët shqiptarë, pavarësisht kohës kur kanë mbajtur funksione apo mbajnë, kanë një listë me këshilltarë të jashtëm.
Por Lili Ismaili rezulton se është parukierja që kujdeset për zonjën e parë, Armanda Begaj, dhe kjo provohet nga fotot që janë të publikuara në rrjet.
Që Presidenti ka përfshirë në delegacion një parukiere apo grimiere nuk ka asgjë të keqe, pasi kuptohet që në takimet e rëndësishme që do të zhvillojë ai dhe Zonja e Parë, duhet të jesh edhe me flokë të rregulluara. Çështja është që Kreu i Shtetit e ka cilësuar zonjën Ismaili si këshilltare të jashtme.
Ndoshta një lapsus, ndoshta edhe një “titull” sa për ti krijuar mundësinë që ta përfshijë në delegacionin që është nisur drejt SHBA.
Ky moment nuk kishte si ti shpëtonte edhe Genc Sejkos, i njohur si njeriu i memeve, që në rrjetet sociale, ngre pyetjen: Po parukierja si do të futet në OKB.
“Presidenti i Republikes përgatitet të niset për në OKB me një staf prej 20 vetash. Vetëm presidenti e di se përse i duhen 20 veta me vete për një mbledhje rutinë. Mirë këta që e këshillojnë por parukierja gruas si do hyjë në OKB?”, shkruan Sejko.
Discussion about this post