Kuintalë të tëra me domate të llojit “Ozgan”, farat e të cilave kanë dalë të prishura, përfunduan të kalbura në fermën e fshatit Sukth të bashkisë Roskovecit.
Siç mund të shikojmë edhe në videon e siguruar nga Gijotina.com, domatet e shkuara dëm janë përhapur kudo nëpër serë.
Edhe pse këtë sezon fermerët dështuan në kultivimin e domates në sera, përsëri ata nuk heqin dorë e do të merren me kultivimin e saj dhe në sezonet e tjera.
Gjithashtu rikujtojmë edhe premtimin e ministres Krifca, e cila tha se do të synohet që produktet të përpunohen dhe që fermerët të kenë mundësi të shesin në treg nënproduktet e tyre.
“Mbështetja e buxhetit do shkojë nga fermeri, nga prodhimi deri tek agropërpunimi. Kemi dëshirë të shtojmë vlerën e produktit në Shqipëri. Pra, ne të mos kemi mundësi ta shesim domaten kokërr, por duke e përpunuar atë. Buxheti të rrisë produktivitetin e fermerëve dhe produkteve bujqësore, përforcime do shkojnë edhe në digjitalizimin e pajisjeve në bujqësi”, tha Krifca.
Por mesa duket, asgjë nuk është bërë ende për fermerët, të cilët ende vuajnë për këtë problem. Ata gjithashtu u ngritën në protestë më 25 shtator, por shteti ende nuk ka ndërmarrë një hap kundrejt tyre.
Janë 399 fermerë të këtyre zonave që kanë humbur prodhimin e investuar duke i rrënuar ata. Kultivimi i domates në fusha bëhet kryesisht përmes fidanit të marrë nga serat, ndërsa distancat e mbjelljes varen edhe nga prodhimi dhe periudha e parashikuar. Por sikur se duket këtë shtator, domatet që do duhej të dilnin në prodhim janë hedhur fusha.
