Në 25 mars kompania “Gas group” shpk në pronësi të Bilbil Kastratit dhe Artan Kokës ka fituar tender me mungesë konkurrence me vlerë 131 milionë të vjetra ku skandaloz është fakti që në dokumentat standarte të kontratës sasia e specifikuar është 70,680 kg, pra me kilogramë dhe jo me litra, një gabim që mund të duket njerëzor por që nga leximi i dokumentave mund të jetë i qellimshëm pasi dëmton fondet publike në kurriz të qytetarëve.
Në 30 mars është lidhur kontrata për tenderin me numr REF-20045-02-18-2022 për blerjen e gazit të lëngshëm për gatim e cila është organizuar nga Drejtoria e Përgjithshme e Çerdheve dhe Kopshteve (DPÇK), institucion në varësi të bashkisë Tiranë i cila drejtohet nga Zhaneta Beqiri prej 7 vitesh.
Më i rëndë është fakti se nëse njësia matëse është vendosur gabimisht i bie të jetë 70,680 litra gaz ku sipas llogarive në bazë të vendimit të bordit të transparencës në 29 mars, me çmimin e shitjes me pakicë të gazit për periudhën 29 mars- 31 mars 2022, me vlerë 116 lekë/litër, rezulton se marrëveshja midis bashkisë Tiranë dhe kompanisë “Gas group” shpk kap vlerën e 81 milionë lekëve të vjetra, pra 30 milionë lekë më pak të cilat shkojnë në xhepin e operatorit ekonomik.
Gjithashtu tek dokumentat, shkruhet se sasitë e parashikuara janë vetëm sasi orientuese dhe nuk e kushtëzojnë DPÇK-në për t’i blerë ato.
“DPÇK-ja ka të drejtë të blejë më pak apo më shumë sasi se sa ato të parashikuara.(por në çdo rast brenda vlerës së përllogaritur të marreveshjes kuadër)” – shkruhet tek dokumentat ku sipas logjikës nëse rritet apo ulet çmimi, vlera e marrëveshjes nuk tejkalohet. Pra, ligjërisht 30 milion lekë të vjetra shkojnë në llogaritë e kompanisë në një marrëveshje e cila është shkruar nga bashkia Tiranë ku keqpërdoren fondet nga taksat e qytetarëve për të favorizuar “Gas group” shpk. Ky rast midis qindra rasteve në bashkinë e Erion Veliaj reflekton atë që shkruhej në raportin e KLSH-së para disa ditësh për dëmet ekonomike në vitin 2021 ku thuhej: Probleme me procedurat e prokurimit publik, probleme me zbatimin e prokurimit publik.
Problem tjetër në kontratë është fakti se shkruhet se gjatë kohës së zbatimit të kontratës për furnizimin me karburant, gasoil, benzol dhe karburant për ngrohje, vlera absolute e normës së fitimit nuk do të ndryshojë gjatë ekzekutimit të kontratës, në rast të luhatjes së çmimeve. Pra, përsëri kompania merr fitimin pavarësisht nëse bursa çmendet siç tha kryeministri Edi Rama para ca kohësh duke iu referuar çmimit të lartë të karburanteve.
Mungesa e konkurrencës e nxjerr automatikisht tenderin me flamur të kuq pasi ka rrezik për korrupsion dhe sjellje antiligjore. Dyshimet përforcohen kur një nga pronarët kryesorë është edhe aksioner tek kompania “Kastrati” shpk, një nga operatorët ekonomikë që ka marrë më shumë tendera pa garë nga Erion Veliaj dhe qeveritë e Rilindjes.
“Gas group” shpk me pronar Bilbil Kastratin dhe Artan Kokën kanë marrë nga bashkia Tiranë 11 tendera me vlerë 461 milionë lekë të vjetra ku shumica janë me flamuj të kuq për të cilët ka dyshime të forta për korrupsion dhe klientelizëm sipas Open Data Albania.
Discussion about this post