Lumi Drino në Gjirokastër është mbuluar këtë mëngjes me mbetje të shumta spitalore. Nuk dihet se kush i ka hedhur këto mbetje aty, por përveç pamjes së keqe ky veprim përbën rrezik të lartë mjedisor. Ditën e sotme shtrati i Lumit “Drino” është përplot me mbetje spitalore, të cilat po rrezikojnë jo vetëm gjallesat dhe bimësinë, por kërcënojnë edhe shëndetin e njerëzve, sidomos gjatë muajve të verës kur lumi frekuentohet veçanërisht nga të rinjtë dhe fëmijët. Bashkitë Gjirokastrës, Libohovë dhe Dropull, kanë premtuar frenimin e ndotjes së shtratit të Lumit Drino përmes vendosjes së gjobave për shkaktarët e ndotjes, por siç pranojnë vetë zyrtarisht, gjatë vitit 2021, nuk u ndëshkua asnjë biznes apo qytetar që ka ndotur lumin.
“Detyrimisht ne do të vemi dhe tek gjoba siç kemi vajtur tek gjoba për plehrat që hidhen vend e pa vend në përrenjtë e Gjirokastrës, do shkojmë tek gjoba edhe për bizneset dhe qytetarët që ndotin lumin Drino.”- deklaroi nënkryetari i Bashkisë së Gjirokastrës Ylli Muho, dy vite më parë. Por, ditën e sotme lumi përveç mbetjeve të ndryshme është mbuluar edhe nga ato spitalore që janë akoma më të rrezikshme për jetën e qytetarëve. Duke shtuar këtu faktin që pranë lumit ka banesa dhe familje që jetojnë aty.
Discussion about this post