Një skandal i madh ka shpërthyer në Itali pas publikimit të fotove të manipuluara të grave të njohura nga jeta publike italiane, në një faqe pornografike. Ndër figurat e përmendura janë Kryeministrja Giorgia Meloni dhe udhëheqësja e opozitës, Elly Schlein.
Sipas raportimeve të “The Guardian”, bëhet fjalë për faqen Phica, një emër që përbën një anagram të një fjale vulgare në italisht, ku janë ngarkuar këto imazhe të manipuluara, të shoqëruara me komente seksiste dhe fjalor të papërshtatshëm.
Fotot e publikuara në seksionin “VIP” të faqes përfshinin politikane nga të gjitha partitë dhe ishin shkrepur gjatë daljeve të tyre publike, konferencave apo pushimeve. Ato ishin përpunuar digjitalisht për të theksuar pjesë të trupit apo për të sugjeruar poza me përmbajtje seksuale.
Kjo platformë, e cila thuhet se ka mbi 700 mijë abonentë, është krijuar që në vitin 2005 dhe ka funksionuar për një kohë të gjatë pa ndërhyrje. Situata ndryshoi kur disa përfaqësues të Partisë Demokratike, parti e qendrës së majtë, paraqitën kallëzime penale ndaj faqes. Tashmë çështja është në duart e autoriteteve italiane që kanë nisur një hetim zyrtar mbi aktivitetin e saj.
Përveç figurave politike, mes viktimave janë edhe personalitete të njohura si aktorja Paola Cortellesi dhe influencer-ja e njohur italiane Chiara Ferragni, fotot e të cilave janë përdorur pa leje.
Një ndër të parat që reagoi publikisht ishte Valeria Campagna, politikane e Partisë Demokratike, e cila paraqiti një kallëzim zyrtar dhe bëri thirrje për solidaritet ndaj të gjitha grave të prekura. Italianët e kanë cilësuar këtë si një moment të ngjashëm me lëvizjen #MeToo.
Ndërkohë, është duke u zhvilluar një peticion publik për mbylljen e faqes Phica, i cili deri më tani ka mbledhur mbi 150 mijë nënshkrime.
Në një postim në Facebook të mërkurën, Campagna shkroi: “Jam e neveritur, e zemëruar dhe e zhgënjyer, por nuk mund të qëndroj e heshtur pasi zbulova që fotografitë e mia ishin publikuar në këtë faqe pa pëlqimin tim. Jo vetëm foto me rroba banje, por edhe momente nga jeta ime publike dhe private. Nën to, kishte komente seksiste, të ulëta dhe të dhunshme. Kjo nuk ka të bëjë vetëm me mua. Ka të bëjë me të gjitha ne. Me të drejtën tonë për të qenë të lira, të respektuara dhe për të jetuar pa frikë.”
Pas saj reaguan edhe politikanet e tjera nga Partia Demokratike: Alessia Morani, Alessandra Moretti dhe Lia Quartapelle, duke mbështetur fushatën kundër faqes dhe kërkuar ndëshkimin e atyre që qëndrojnë pas saj.
“Për fat të keq, nuk jam e vetmja. Duhet t’i denoncojmë këto grupe burrash që veprojnë në formë bandash dhe nuk ndëshkohen, pavarësisht ankesave të shumta. Këto faqe duhet të mbyllen menjëherë. Mjaft më!”, shkroi Morani në Instagram.
Ndër politikanet e së djathtës ekstreme që janë vënë në shënjestër janë edhe Alessandra Mussolini, mbesa e diktatorit Benito Mussolini dhe anëtare e partisë Lega, si dhe Daniela Santanchè, Ministre e Turizmit në qeverinë italiane.
Discussion about this post