Partia Lëvizja Socialiste për Integrim vazhdon të nxjerrë çdo ditë detaje të reja rreth aferës gjigande të inceneratorëve. Në një deklaratë për mediat ditën e sotme, sekretarit të Përgjithshëm i LSI, Endrit Braimllari , ka nxjerrë disa fakte të reja kundër qeverisë së kryeministrit Edi Rama dhe bashkisë së Tiranës. Sipas Braimllarit ata kanë përdorur institucionet shtetërore dhe skemën e evazioni fiskal që kap vlerën e 189 milionë dollarë nëpërmjet firmave fiktive.
“Është e qartë që kemi të bëjmë me një grup të strukturuar kriminal që kokat i ka në kryeministri dhe në Bashkinë e Tiranës. Kjo aferë korruptive nuk mund të vihej në zbatim pa mbështetjen e drejtpërdrejtë të Edi Ramës dhe Erion Veliaj. Edi Rama dhe Erion Veliaj nuk janë mjaftuar vetëm me skemën fiktive të ndërtimit të inceneratoratorit por kanë vënë në zbatim duke përdorur institucionet shtetërore dhe skemën e evazioni fiskal që kap vlerën e 189 milionë dollarë nëpërmjet firmave fiktive duke vjedhur identitetin e qytetarëve. Janë 24 kompani fiktive me të cilat janë vjedhur 189 milionë dollarë të cilat janë para të qytetarëve shqiptarë. Ndërkohë qytetarët paguajnë çdo ditë 80 mijë dollarë për kontratën korruptive të inceneratorit të Tiranës”, u shpreh ai.
Braimllari i ka bërë thirrje SPAK se koha nuk pret dhe se duhet të nisin hetimet për të nxjerrë para drejtësisë kryeministrin Edi Rama dhe kryetarin e Bashkisë së Tiranës. Sipas tij, çdo ditë ata po vjedhin qytetarët dhe faktet janë para syve, por SPAK duhet të zgjohet nga gjumi dhe të vërë para drejtësisë Ramën dhe Veliajn.
“Edi Rama dhe Erion Veliaj duhet të vihen sa më shpejt përpara drejtësisë, si dy kokat e grupit të strukturuar kriminal të inceneratorëve, skemë e cila i ka vjedhur qytetarëve miliona euro. Këto para të cilët shkojnë për xhepat e mafies së plehrave duhet të ishin përdorur për të ndihmuar familjet shqiptare në nevojë, bizneset e vogla si dhe për të shtuar investim në arsim dhe shëndetësi.
Koha për SPAK nuk pret. Është momenti për të vepruar dhe për të provuar që reforma në drejtësi e votuar me 140 vota dhe me kontributin e jashtëzakonshëm të LSI të vihet në zbatim dhe të mos shantazhohet nga Edi Rama dhe Erion Veliaj”, deklaroi Braimllari. Ndërkohë, pak ditë më parë vetë Monika Kryemadhi paralajmëroi se në vijim do të zbulohen fakte dhe emra të përfshirë në aferën e inceneratorëve.
Discussion about this post