Presidenti Ilir Meta ka reaguar pas skandalit të publikimit të databazës me pagat e qytetarëve të punësuar në sektorin privat dhe publik, të cilat janë të aksesueshme nga kushdo dhe po shpërndahen me shpejtësi në rrjetin social “WhatsApp”. Meta e ka konsideruar këtë rrjedhje informacioni si shkelje të ligjit dhe dinjitetit të qytetarëve dhe si një rast i përsëritur pas skandalit të patronazhistëve.
“U njoha nga mediat për daljen në publik, të një liste me të dhënat sensitive personale të 637,138 qytetarëve të punësuar, në shkelje flagrante të lirive, të drejtave dhe dinjitetit njerëzor, të ligjeve dhe të Kushtetutës, një rast paligjshmërie i përsëritur, pas skandalit të patronazhistëve”, shkruan Meta.
Sipas Metës këto të dhëna mbrohen me ligj dhe përdoren vetëm për interes të shtetit apo të qytetarëve.
“Të dhënat personale të çdo shtetasi, që depozitohen në institucionet publike dhe që administrohen në bazat e të dhënave shtetërore, janë personale, mbrohen me ligj dhe kanë për qëllim përdorimin e tyre vetëm për interesin e shtetasve dhe të shtetit”, thekson Meta.
Meta shton se përdorimi i tyre është akt kriminal që rrezikon paqen sociale dhe cënon sigurinë e qytetarëve. Lidhur me këtë skandal, Meta ka kërkuar nga organet kompetente të vënë para ligjit përgjegjësit.
“Çdo lloj përdorimi i ndryshëm i tyre është akt kriminal, që rrezikon paqen sociale duke cënuar sigurinë private të çdo qytetari. I bëj thirrje agjencive ligjzbatuese dhe të ndjekjes penale, të vihen menjëherë në lëvizje, të nisin verifikimet dhe hetimet, të faktojnë këtë veprimtari të përsëritur të paligjshmërisë, duke marrë pa vonesë masat e nevojshme për të garantuar mbrojtjen e të dhënave personale dhe vënien përpara përgjegjësisë të autorëve”, përfundon Meta.
Discussion about this post