Skandali me mbetjet rikthehet sërish në vëmendje, këtë herë jo në Durrës apo Elbasan, por në hyrje të parkut Kombëtar të Përmetit.
Ndonëse një nga destinacionet më të preferuar të të huajve, për shkak të natyrës dhe bukurisë që ofron, Përmetit i dihet të përballet me “tekat” e qeverisë për ta kthyer në landfill plehrash.
Dy janë destinacionet kryesore ku shkojnë turistët, “Banjat e Bënjës” dhe Parku Kombëtar “Bredhi i Hotovës”. Por, në vend që këto pasuri të promovohen, në hyrje të Parkut Kombëtar “Bredhi i Hotovës” ka nisur ndërtimi i një landfilli për përpunimin e plehrave.
Landfilli është vendosur të ndërtohet në dalje të fshatit Piskovë, në rrugën që të çon jo vetëm në “Bredhin e Hotovës”, por edhe në Teqenë e Alipostivanit, e cila është ndër më të famshmet në Shqipëri dhe vizitohet çdo fundjavë nga mijëra njerëz të ardhur nga qytete dhe vende të ndryshme.
Përveç marrëzisë së ndërtimit të një landfilli plehrash në hyrje të një parku kombëtar, të cilin banorët vendas e kanë ruajtur të paprekur edhe në çmendurinë e 97-s, ky landfill është problematik edhe për banorët e zonës, që jo vetëm kanë të mbjellat por vetëm 500 metra më poshtë ndodhet ujësjellësi i ujit të pijshëm.
Banorët kanë paralajmëruar protesta, ndërkohë kryetarja e Bashkisë, Alma Hoxha, është mjaftuar vetëm duke thënë se vendimi është marrë nga Tirana dhe ajo nuk ka asgjë në dorë.
Discussion about this post