Ditën e shtunë në programin Për’puthen ka ndodhur një skandal mes konkurrentëve, konkretisht mes Alvisa Qarrit dhe ish të dashurit të saj, Hyseni Rama, ku ky i fundit publikoi disa incizime dhe mesazhe me vajzën në fjalë. Ai ka hedhur akuza të forta ndaj Alvisës duke e nxjerr atë mashtruese dhe të shtirur, madje duke i thënë se nuk veproi ashtu sikur i kishte kërkuar ai. Nga ana tjetër, Alvisa ka publikuar disa foto dhe mesazhe ku tregonte se Hyseni e ka mbajtur me zor në komunikim pasi ajo hyri në program dhe gjithashtu e ka dhunuar në kohën kur bashkëjetonin.
Reagime të shumta ka pasur në rrjet kësaj ngjarje, ku një pjesë e publikut kërkonin ndjekjeje penale për Hysenin. Ndërkohë përmes një deklarate ka reaguar sot Rrjeti për Fuqizimin e Grave Shqiptare. Kjo organizatë i ka dërguar një letër televizionit “Top Channel”, shprehet se emisioni i së shtunës ka promovuar dhunën ndaj grave, si dhe ka transmetuar mesazhe që nxisnin prekjen e barazisë gjinore.
Në letë thuhet se, me imazhet e transmetuara emisioni e tregon figurën e femrës si pronë të mashkullit dhe hapur është shkelur privatësia e saj. “Të nderuar/a përfaqësues/e të programit: “Përputhen”, pranë televizionit kombëtar “Top Channel”, Ju drejtohemi në emër të një grupi organizatash që punojnë për mbrojtjen dhe promovimin e të drejtave të njeriut, të drejtave të vajzave dhe grave, si dhe me fokus të veçantë viktimat e dhunës me bazë gjinore. Duke ndjekur programacionin Tuaj, kemi vërejtur me shqetësim se më datë 6 Nëntor 2021, në emisionin “Përputhen”, janë transmetuar për publikun mesazhe të gabuara lidhur me dhunën me bazë gjinore.
Përgjatë programit dhe formatit të tij u trajtua në mënyrë të detajuar historia e një prej pjesëmarrëseve, Alvisa Qarri. Ne vlerësojmë se mënyra e trajtimit të ngjarjeve të Alvisa Qarri, justifikon, përkrah në mënyrë të drejtpërdrejtë dhe legjitimon mentalitetin patriarkal të cilësimit të partneres/partnerit si “pronë”, ushtrimin e dhunës me bazë gjinore, duke u bërë kështu faktor në transmetimin e mesazheve të gabuara sa i takon dhunës me bazë gjinore dhe të drejtave të grave si të drejta të njeriut”, thuhet në letër.
Ndër të tjera, Rrjeti për Fuqizimin e Grave Shqiptare evidenton se përmes emisionit ju jepet mundësi njerëzve që të paragjykojnë, etiketojnë dhe krijojnë stereotipa për figurën e femrës shqiptare. Prandaj, kjo organizatë i kërkon televizionit që të mos përdorë më histori të tilla personale për qëllime dhe përfitime mediatike.
“ Trajtimi jo i drejtë i këtij rasti ka nxitur gjithashtu një valë reagimesh të cilat paragjykojnë dhe etiketojnë vajzat dhe gratë e dhunuara, duke justifikuar dhunën ndaj tyre por, nga ana tjetër, edhe një valë të gjerë reagimesh të cilat nuk e përkrahin qëndrimin e programit, opinionistit dhe/apo drejtueses. Kjo qasje përforcon përsëri stereotipet gjinore ku gratë perceptohen si të nënvlerësuara, si pronë dhe ku dhuna tolerohet apo justifikohet. Pavarësisht faktit se Alvisa Qarri është në moshë madhore dhe është përgjegjëse për vendimet/zgjedhjet e saj, ne vlerësojmë se kjo histori nuk duhej përdorur në një fokus mediatik të tillë”, thekson letra.
Në përmbyllje, organizata i kërkon “Top Channel” që të punojë për respektimin e parimeve etike gjatë transmetimit të materialeve që kanë të bëjnë me të drejtat e njeriut dhe dhunës me bazë gjinore, duke shmangur promovimin e rasteve të cilat pranojnë dhe justifikojnë dhunën, direkt apo indirekt. E.H.Gijotina.com/
Discussion about this post