Skandali te Onkologjiku, lihen në fuqi masat e sigurisë/ Edmond Gashi: Më lironi, kam pacientë për të operuar

Gjykata e Posaçme ka lënë në fuqi masat e sigurisë për mjekët e përfshirë në hetimet për dosjen e spitalit Onkologjik në QSUT.

Gjatë seancës së rivlerësimit të masës së sigurisë për 7 të akuzuarit, këta të fundit kanë kërkuar shuarje të masave.

Mjeku Edmond Gashi ka kërkuar të lirohet nga “arresti në shtëpi” me pretendimin se ka dhjetëra operacione për të kryer.

Mjekja Alketa Pere është shprehur para gjykatës se nuk e di pse ndaj saj është caktuat një masë sigurie, duke pretenduar se nuk ka kryer asnjë shkelje ligjore.

Gjykata e Posaçme, në fund të seancës, vendosi të mos ndryshojë masat që Gjykata e Tiranës caktoi për ta tre javë më parë.

Me këtë vendim, Edmond Gashi dhe Florian Marku do të vijojnë të qëndrojnë në “arrest në shtëpi”, ndërsa për Alketa Pere, zv.drejtoreshën e QSUT Brikena Qirjazi, koordinatorin Emiljano Lela, administratorin e klinikës private Halil Gashi dhe ish-specialisten e QSUT Drilona Kishta, mbetet në fuqi masa “detyrim paraqitje”.

Sipas hetimit të deritanishme, të dyshuarit kishin ngritur një skemë abuzive të zvarritjes së trajtimit të të sëmurëve me kancer në Spitalin Onklologjik, me qëllim dërgimin e tyre në një klinikë private.

I njëjti hetim, zbuloi mosvënien në punë të pajisjes së kobalto-terapisë tek Onkologjiku, e instaluar prej vitit 2021, si edhe lënien e saj në një ambient të papërshtatshëm, duke u bërë burim i rrezikshëm radioaktivitetit për stafin mjekësor dhe pacientët. Po ashtu, nga hetimi u dokumentua kontrabandimi i ilaçeve të spitalit për kancerin dhe tregtimi i tyre në dy farmaci private.