Ministrja e Shëndetësisë, Albana Koçiu shmangu përgjegjësinë nga vetja për skandalin te Onkologjiku, duke hedhur akuza mbi mjekët nën hetim.
Një hetim i prokurorisë së Tiranës zbuloi në bashkëpunim me njëri-tjetrin, mjekët, specialistët dhe administratori i spitalit orientonin pacientët e diagnostikuar me sëmundje tumorale në klinika private me qëllime përfitimi, duke mos u ofruar shërbimet në spitalin Onkologjik në QSUNT. Hetimet zbuluan gjithashtu se në spitalin ‘Nënë Tereza’ ka qenë i vendosur dhe burimi i kobaltit që shërbente për radioterapinë, por nuk vihej në punë dhe ishte jashtë standardeve, duke u kthyer në një burim rreziku për pacientët. Shitja me çmime të kripura në disa farmaci të barnave të dedikuara ekskluzivisht për Spitalin Onkologjik dhe që nuk janë në qarkullim të lirë ishte një tjetër abuzim që u shfaq në dosjen hetimore.
Shtatë masa sigurie u dhanë nga gjykata e Tiranës lidhur me dosjen penale, ndërsa skandali shkaktoi reagim publik. Një protestë u zhvillua pasditen e djeshme me tubuesit që kërkuan dorëheqjen e ministres së Shëndetësisë, Albana Koçiu. Të njëjtën kërkesë artikuluan edhe deputetët e opozitës në Kuvend këtë të enjte, teksa kishin thirrur në një interpelancë për çështjen ministren e Shëndetësisë.
Kjo e fundit, ashtu si në reagimet paraardhëse, e hoqi përgjegjësinë nga vetja dhe fajësoi për skandalin personelin mjekësor nën akuzë.
“Abuzimi i rëndë me detyrën i një grupi mjekësh, farmacistësh e stafi shëndetësor që kanë luajtur me jetën e të sëmurëve duke kapërcyer çdo lloj norme profesionalizmi e ndjesie njerëzore është një akt dhe një sjellje që ka vetëm një përgjigje, ndëshkimin ligjor, ndëshkimin administrativ, por edhe moral. Çdo njëri nga ata burra dhe gra për të cilët Ministria e Shëndetësisë ka nisur hetim administrativ, krahas hetimit që ka filluar prokuroria, do të mbajnë mbi shpinë jo vetëm peshën e ligjit, por edhe moralin e turpit”, tha Koçiu.
Ajo paralajmëroi amendim në ligjin e Urdhrit të Mjekut dhe të Infermierit, me qëllim që, siç tha: “të gjithë profesionistëve të shëndetësisë të cilëve do t’i hiqet e drejta e ushtrimit të profesionit në rast se do të bëjnë ndërhyrje dhe sjellje amorale që cënojnë figurën e profesionistëve të shëndetësisë”.
Më tej, u shpreh se skandali po përdoret politikisht: “Nuk mund të përbaltet çdo kush që e bën punën me devotshmëri, me profesionalizëm të lartë dhe jo pak janë shembujt e dëshmisë së profesionalizmit të ekipeve mjekësore. Ne vlerësojmë ndershmërinë dhe profesionalizmin, abuzuesit jo profesionistë do të marrin në çdo kohë ndëshkimin e merituar”.
Nga ana tjetër, deputetja demokrate Albana Vokshi tha se Koçiu, bashkë me ministrat Manja e Manastirliu duket të shkarkohen pasi ishin në dijeni për skandalin.
Më herët, raportimet mediat, por edhe një raport i Kontrollit të Lartë të Shtetit publikuar gati një vit më parë, kanë zbuluar problematikat e theksuara te spitali Onkologjik, që trajton të sëmurët me kancer. Raporti i KLSH-së për Onkologjikun përshkruante një situatë alarmante ku vihej në lojë jeta e pacientëve. Megjithatë, pavarësisht konstatimeve, problematika vijoi.
Kritika ka pasur edhe për prokurorin e çështjes Bledar Valikaj për mos ngritjen e stekës së hetimit te drejtuesit e spitalit “Nënë Tereza” dhe më tej në Ministrinë e Shëndetësisë.
Discussion about this post